SALAMO 72:1-15

¹Dirava e, mani emu kara, king dekenai oiemu kara maoromaoro do oi hadibaia, vadaeni ia ese taunimanima ia kota henia neganai, mai maoromaoro bona momokani danu do ia karaia.

²Bona do oi durua, ia ese oiemu bese taudia do ia biagua mai ena maoromaoro danu. Ia ese oiemu taudia, hisihisi idia abia noho taudia danu, be do ia naridia, mai ena momokani danu.

³Tano do oi hanamoa, vadaeni taunimanima do idia noho namo, edia gaukara ena anina do idia abia. Kara maoromaoro danu, be taunimanima edia lalona dekenai do oi havaraia.

⁴King do oi durua, ia ese, ogogami taudia maka tamona dekenai do ia kota henidia, bona ia ese gau lasi taudia edia natudia do ia durua. Ma haida idia dagedage henidia taudia, be king ese idia do ia atoa diho.

⁵Lau ura oiemu bese taudia, be oi dekenai do idia tomadiho nega ibounai. Dina bona hua idia do diari noho negadia ibounai, oiemu bese oi dekenai do idia tomadiho.

⁶Oi ese king do oi durua, vadaeni ia be tau namona do ia lao. Iena kara be medu bamona, uma dekenai ia diho, bona aniani ia tubu namo herea.

⁷Lau ura king ena mauri dinadia ibounai lalonai, iena bese taudia ese kara maoromaoro do idia karaia, bona edia noho be namo, bona edia gaukara ena anina do idia abia, hua ese iena diari ia henia dinadia ibounai.

⁸King ena basileia be mani do ia bada, davara ta dekena amo ela bona ma davara ta, Euperate Sinavai dekena amo ela bona tanobada ena dokona dekenai.

⁹Etiopia taudia ese king ena vairanai do idia tui diho, bona king dekenai idia dagedage taudia ese, iena vairanai do idia moru diho, edia kwaradia be tano dekenai do idia atoa.

¹⁰Tarasisi ena king, bona motumotu edia king ese, edia harihari gaudia be ia dekenai do idia mailaia. Sieba bona Seba edia king danu ese, edia takisi moni do idia mailaia ia dekenai.

¹¹King ibounai be iena vairanai do idia tui diho, bona bese ibounai taudia ese, iena hesiai gaukara do idia karaia.

¹²Ogogami taudia be ia dekenai idia boiboi neganai, ia ese do ia durua. Edia gau be lasi, bona edia durua be lasi taudia, be king ese do ia hamauria.

¹³Ia ese manoka taudia, bona ogogami taudia dekenai do ia bogahisihisi, bona gau lasi taudia be mase dekena amo, ia ese do ia hamauria.

¹⁴Bema unai ogogami taudia, be haida ese idia dagedage henia neganai, king ese unai ogogami taudia do ia hamauria. Ia ese edia mauri do ia naria namonamo noho, badina edia mauri be gau namo herea ia dekenai.

¹⁵King ena mauri do ia daudau be namo! Sieba ena golo be king dekenai idia henia be namo. Namona be iena bese taudia ese, king dainai Dirava do idia noia, vadaeni Dirava ese king do ia durua, bona do ia hanamoa, nega ibounai.