Salamo 71:11-21

¹¹si ene, “Eaubada tau ta i lausuaraei, ta henauwatai ta toai, paana nige doga esau bena i saguhai.”

¹²Eaubada e, tabu u lausuara aririegu; egu Eaubada e, u heurama u saguigu!

¹³Isi tau hegirugu bena se hetaumaeamaeadi eo se hetauyamuidi; isuewa eo taumaeamaea bena i buburidi, isi se aipate se hebaaeagu wa.

¹⁴Na eau egu sunuma abo i otahai huia gamagamagari, oa hinage abo ea hedebasae aririem.

¹⁵Awagu eai em abidudurai abo ea ribaribaei, em abihemauri laulaudi asubena gamagamagari, paana se gamagari ariri, nige gonoana ea hasiridi.

¹⁶Guiau EAUBADA ena paipaisoa gigigigiboridi abo ea wasawasaedi; oa oabom em laulau dudurai abo ea hedebasaei.

¹⁷Eaubada e, egu hewari huiana eai oa u heaheatagu, i laoma e wauta em laulau gigigigiboridi ea wasaduaiedi.

¹⁸Arinai egu huia tautaubada eo egu huia uruhou eai, Eaubada e, tabu u abigabaegu, i lau e em adidiri ea wasaduaiei isimurita gamagari aridi eai. Em gigibori

¹⁹eo em laulau dudurai, Eaubada e, se sae e galewa ewana eai. Oa em paipaisoa se lai ariri, Eaubada e, eai doha oa?

²⁰Egu lauita lailaidi u hegamagari aririedi, na oa abo u hemauriuioigu; tano boeana eai abo u abiisiniuioigu.

²¹Heasisi enagu abo u helaiama, eo nuagu abo u hebigauioi.