SALAMO 69:17-35

¹⁷Vairamu na emu hesiai tauna ena amo basio hunia, badina be hisi ese e gugubagumu; a haere henigu haraḡa,

¹⁸a raka kahira, ba hamaurigu, ba ruhagu nege, lau inaigu daidiai.

¹⁹Dibamu ede e gwau henigu tomamu, egu hemarai bona egu koikoi oi dibamu, inaigu iboudiai na oi dibamu.

²⁰Laumagu e dauremu, gwaugwau herevadia daidiai daragu e dokomu. Hebogahisi na tahua, to asi ḡauna; tauhalo taudia na tahudia, to ta asina davaria.

²¹Mase muramurana e henigu, agu; ranu e masegu ai na vine ranuna iditana e henigu, baina inua.

²²Sibodia edia dabara vairadiai na idoa ai bainela, edia aria helagadia na rikiriki ai baela ediai.

²³Matadia bae valahu-valahu, basie ita; batubatudia na bae heude-heude loulou.

²⁴Emu badu na latadiai ba seia dobi, emu badu ḡaraḡarana ese baine lasidia tao.

²⁵Edia taruha baine vahu, edia kalaga ai tau ta basine noho.

²⁶Badina be oi ese vada o hahisia tauna na idia ese ma e daḡedaḡe heniamu, bona oi ese vada o haberoa tauna na idia ese ma e hahisihisiamu.

²⁷Mata-hakani latanai mata-hakani ma bavatoa idia ediai; emu hahemaoro ai basio ruhadia nege.

²⁸Ladadia na mauri taudia edia buka amo bae heroho, ladadia na kara maoromaoro taudia ladadia ida basie hetore.

²⁹A lau be na ogoḡamimu bona na hisihisimu: Dirava e, emu hahemauri ese atai ai baine atogu.

³⁰Lau ese Dirava ladana na egu ane ai baina heatolaia, egu hahenamo herevadia ai baina imodaia.

³¹Ina kara na Iehova baine moalelaia bada, a boromakau baine moalelaia maraḡi, boromakau maruanena mai doana bona mai aena kahaudia ida baine moalelaia maraḡi.

³²Ogoḡami taumui, ba itaia bona ba moale; Dirava o tahuamu taumui, lalomui bae mauri lou;

³³badina be Iehova ese e dabumu taudia na e kamonai henidiamu, ena orea taudia iḡuidia ai e nohomu na se dadaraidiamu.

³⁴Guba bona tanobada ese bae imodaia, davara danu, bona lalonai e loamu ḡaudia.

³⁵Badina be Dirava ese Siona baine hamauria, bona Iuda hanuadia baine haginidia lou; iena hesiai taudia na unuseni ai bae noho, bae abia edia gabu;