SALAMO 68:8-31

⁸tano be ia mareremarere, bona guba ese medu bada ia siaia diho, Sinai Ororo ena Dirava ia mai noho dainai, Israela ena Dirava ia mai noho dainai.

⁹Dirava e, momokani oi ese medu bada herea oi siaia diho, bona oiemu tano kaukau oi hanamoa lou.

¹⁰Vadaeni oiemu bese taudia be unai tano dekenai, edia noho gabuna idia davaria, bona oiemu hariharibada dainai, ogogami taudia dekenai aniani bona gau oi henidia.

¹¹Lohiabada ese iena oda ia gwauraia, vadaeni taunimanima momo ese, unai hereva idia gwauraia hedinarai, idia gwau,

¹²“King taudia bona edia tuari taudia idia heau lao noho!” Ruma dekenai idia noho hahine ese, edia bese tuari taudia ese idia abia kohu idia haria.

¹³Pune manu laulau gaudia, edia hanina be siliva dekena amo idia koua, bona pune manu hanina edia huina be golo namo herea, ia diaridiari gauna, dekena amo idia koua. To umui haida, badina dahaka tuari dinana dekenai, mamoe edia magu murinai umui hunia?

¹⁴Siahu Ibounai Dirava ese, Salamona Ororo dekenai king taudia ia lulua lao ore neganai, ia ese sinou unuseni ia siaia diho.

¹⁵Basana Ororo be ororo badana momokani. Basana Ororo be mai ena dorina momo.

¹⁶Dorina momo ena ororo e, badina dahaka mai mama danu, Dirava ia ura do ia noholaia Ororo umui itaia noho? Lohiabada be unuseni do ia noho ela bona hanaihanai.

¹⁷Lohiabada be Sinai Ororo dekena amo, iena helaga gabuna dekenai ia mai, mai ena kariota goadadia momo herea danu.

¹⁸Iena ororo badadia dekenai ia daekau lao, bona ia ese ia abia mauri tuari taudia momo ia hakaudia daekau. Dagedage taudia momo dekena amo harihari gaudia ia abia noho. Unai ororo dekenai Lohiabada Dirava be do ia noho.

¹⁹Lohiabada do ita hanamoa. Ia ese dina ibounai iseda maduna metaudia ia huaia noho. Ia ese ita ia hamauria noho.

²⁰Iseda Dirava be taunimanima ia hamauria Diravana. Ia be Lohiabada, iseda Dirava, bona ia ese mase dekena amo ita ia hamauria noho.

²¹Dirava ese ia dekenai idia dagedage taudia, edia kwaradia do ia hamakohia. Edia kara dika daladia idia karaia noho taudia, be Dirava ese edia kwaradia, mai huidia bada danu do ia hamakohia momokani.

²²Lohiabada ia hereva vadaeni, ia gwau, “Oi dekenai idia tuari henia taudia, be Basana dekena amo do lau mailaidia lou. Davara dobu gabudia dekena amo do lau mailaidia lou.

²³Vadaeni emui aedia be rara dekena amo do umui hadigua, bona emui sisia ese edia maladia dekena amo, umui idia tuari henia taudia edia rarana do idia ania.

²⁴Dirava e, mai oiemu hairaina danu oi raka hanaia noho, be ibounai ese oi idia itaia. Egu Dirava, egu King, mai ena orea, be gabu helagana dekenai idia raka vareai noho, mai edia hairaina danu.

²⁵Ane idia abia taudia be orea ena vairana dekenai idia raka noho. Idia edia murinai be miusiki idia gadaralaia noho taudia. Bona idia edia huanai, be kekeni ese tareko idia botaia noho.

²⁶Iena bese taudia edia hebou badana lalonai, Dirava do ita hanamoa. Israela besena taudia ibounai e, Lohiabada do umui hanamoa.

²⁷Beniamina iduhu, iduhu maragina momokani, ese idia ia gunalaia. Idia edia murinai be Iuda iduhu lohia taudia, mai edia orea taudia momo herea. Idia edia murinai be Sebuluno bona Napatali edia lohia taudia.

²⁸Dirava e, oiemu siahu do oi hedinaraia. Oiemu goada be ai dekenai do oi hedinaraia, gunaguna ai durua totona oi hedinaraia goada bamona.

²⁹Vadaeni oiemu Dubu Helaga Ierusalema dekenai dainai, king taudia ese harihari gaudia oi dekenai do idia mailaia.

³⁰Aigupito, unai siriho dekenai ia noho uda boroma, be do oi gwau henia. Bese idauidau, unai boromakau tau oreadia, mai edia boromakau natudia danu do oi gwau henia, ela bona oi dekenai do idia tomadiho henia, bona edia siliva be oi dekenai do idia henia. Tuari dekenai idia moale bada bese taudia, be do oi lulua lao ore.

³¹King taudia ese oi dekenai harihari gaudia do idia henia. Aigupito dekena amo auri laboralabora do idia mailaia. Etiopia taudia ese imadia do idia abia isi, bona Dirava dekenai do idia guriguri.