SALAMO 68:2-21

²Lai ese kwalahu ia hodaia ore hegeregerena, unai bamona danu Dirava ese idia do ia hodaia ore. Kandolo be lahi ena vairanai ia veve ore bamona, kara dika taudia be unai bamona do idia mase, Dirava ena vairana dekenai,

³to kara maoromaoro taudia be do idia moale, Dirava ena vairana dekenai do idia moale bada. Mai boiboi danu edia moale do idia hedinaraia.

⁴Dirava dekenai ane do umui abia, iena ladana be ane dekenai do umui hanamoa. Ori dekenai ia guia noho Diravana, be ane dekenai do umui hanamoa bada. Iena ladana be Lohiabada, bona iena vairana dekenai do umui moale.

⁵Dirava, iena noho gabuna helagana dekenai ia noho Diravana, ese ogogami taudia ia naria noho, bona vabu taudia danu ia gimaia noho.

⁶Dirava ese mai edia turana lasi taudia dekenai, bese taudia ia henidia, bona dibura ruma noho taudia, be dibura dekena amo ia kokia ruhaia, mauri namona idia dekenai ia henia noho. To ia dekenai idia dagedage taudia, be tano kaukau dekenai do idia noho.

⁷Dirava e, oiemu bese taudia oi hakaudia neganai, oi ese taunimanima noho lasi tano oi raka hanaia neganai,

⁸tano be ia mareremarere, bona guba ese medu bada ia siaia diho, Sinai Ororo ena Dirava ia mai noho dainai, Israela ena Dirava ia mai noho dainai.

⁹Dirava e, momokani oi ese medu bada herea oi siaia diho, bona oiemu tano kaukau oi hanamoa lou.

¹⁰Vadaeni oiemu bese taudia be unai tano dekenai, edia noho gabuna idia davaria, bona oiemu hariharibada dainai, ogogami taudia dekenai aniani bona gau oi henidia.

¹¹Lohiabada ese iena oda ia gwauraia, vadaeni taunimanima momo ese, unai hereva idia gwauraia hedinarai, idia gwau,

¹²“King taudia bona edia tuari taudia idia heau lao noho!” Ruma dekenai idia noho hahine ese, edia bese tuari taudia ese idia abia kohu idia haria.

¹³Pune manu laulau gaudia, edia hanina be siliva dekena amo idia koua, bona pune manu hanina edia huina be golo namo herea, ia diaridiari gauna, dekena amo idia koua. To umui haida, badina dahaka tuari dinana dekenai, mamoe edia magu murinai umui hunia?

¹⁴Siahu Ibounai Dirava ese, Salamona Ororo dekenai king taudia ia lulua lao ore neganai, ia ese sinou unuseni ia siaia diho.

¹⁵Basana Ororo be ororo badana momokani. Basana Ororo be mai ena dorina momo.

¹⁶Dorina momo ena ororo e, badina dahaka mai mama danu, Dirava ia ura do ia noholaia Ororo umui itaia noho? Lohiabada be unuseni do ia noho ela bona hanaihanai.

¹⁷Lohiabada be Sinai Ororo dekena amo, iena helaga gabuna dekenai ia mai, mai ena kariota goadadia momo herea danu.

¹⁸Iena ororo badadia dekenai ia daekau lao, bona ia ese ia abia mauri tuari taudia momo ia hakaudia daekau. Dagedage taudia momo dekena amo harihari gaudia ia abia noho. Unai ororo dekenai Lohiabada Dirava be do ia noho.

¹⁹Lohiabada do ita hanamoa. Ia ese dina ibounai iseda maduna metaudia ia huaia noho. Ia ese ita ia hamauria noho.

²⁰Iseda Dirava be taunimanima ia hamauria Diravana. Ia be Lohiabada, iseda Dirava, bona ia ese mase dekena amo ita ia hamauria noho.

²¹Dirava ese ia dekenai idia dagedage taudia, edia kwaradia do ia hamakohia. Edia kara dika daladia idia karaia noho taudia, be Dirava ese edia kwaradia, mai huidia bada danu do ia hamakohia momokani.