SALAMO 5:1-11

¹Lohiabada e, egu hereva do oi kamonai henia. Egu lalohisihisi ena regena mani do oi laloa.

²Egu King bona egu Dirava e! Durua totona oi dekenai lau taitai, be mani do oi kamonai henia, badina be oi dekenai lau noinoi noho.

³Lohiabada e, daba neganai egu gadona oi kamonai noho. Daba neganai, egu noinoi oiemu vairana dekenai lau atoa, bona oiemu haere lau naria noho.

⁴Badina oi be kara dika oi moalelaia lasi, bona oi dekenai dika ta ia noho lasi.

⁵Hekokoroku taudia, be oiemu vairana dekenai idia gini diba lasi. Kara dika taudia ibounai, be oi ese oi badu henidia noho.

⁶Koikoi taudia be oi ese oi hadikaia ore noho. Lohiabada ese alaia taudia bona koikoi taudia, ia dagedage henidia noho.

⁷To oiemu lalokau bada dainai, lau be oiemu Ruma dekenai lau raka vareai diba. Oiemu Dubu Helaga lalonai, oi dekenai lau tomadiho henia diba. Oi dekenai do lau tomadiho mai mataurai danu.

⁸Lohiabada e, lau dekenai idia tuari henia taudia be momo herea. Unai dainai oiemu kara maoromaoro dalana, dekenai lau do oi hakaua, bona oiemu dala be egu vairana dekenai, do oi hedinaraia namonamo.

⁹Lau dekenai idia dagedage taudia, edia hereva be momokani lasi, abidadama gauna lasi. Idia edia kudouna ena ura be, taunimanima do idia alaia mase. Edia gadona ena hereva be guria gabuna bamona, bona edia malana be manada koikoi.

¹⁰Dirava e, edia dika ena davana do oi henia. Mani emu kara edia laloa dikadia ese, edia moru do idia havaraia. Edia kara dika be momo dainai, oiemu vairana dekena amo do oi luludia siri, badina be idia ese oi idia dagedage henia noho.

¹¹To oi dekenai idia abidadama henia taudia, be do idia moale, do idia moale momokani ela bona hanaihanai. Oi ese oiemu ladana idia ura henia taudia ibounai, bona oi dekenai idia moale taudia, be do oi gimaia noho.