SALAMO 57:1-8

¹Ame bogagu hisi, Dirava e, ame bogagu hisi. Badina be oi lalomu ai lau laumagu e komumu; oi hanimu ikerukerudia na egu hemetai gabuna, ela bona hahebua-tari baine ore.

²Dirava Herea Mikamika na tai heniamu, egu ai ena ura e haḡuḡuruamu Diravana.

³Ia na guba amo ena hesiai baine siaia, baine hamaurigu; e moigu taomu taudia ia ese baine hahemaraidia. (Selah) Dirava ese ena hebogahisi bona ena momokani baine siai lasi.

⁴Leona bogaragidiai na hekuremu, taunimanima natudia e anidia lava daemu ḡaudia; isedia na io bona diba, bona maladia na dare ganoka-ganokadia.

⁵Dirava e, guba doriva-dorivana ai bae imodaimu, oi hairaimu na tanobada idoinai daenai baine mia.

⁶Idia na huo e otoa, lau aegu ihatoadia; laumagu na e igo diho. Idia na egu dala ai guri e ḡeia, a ḡau be idia sibodia na lalonai e moru dobi. (Selah)

⁷Lau lalogu na auka; Dirava e, lau lalogu na auka. Ane baina abia, hahenamo anedia baina abi;

⁸laumagu e, a noga. Gitara bona hatai-hatai ḡauna maragina, a noga; lau na daba matana ai baina noga.