SALAMO 52:1-9

¹Goada-herea taumu e, Dahaka dainai Dirava e matauraiamu taudia e kara dika henidiamu na o heaḡilaiamu? Dina idoinai hahebua-tari daladia o haero heḡaeḡaemu.

²Kara koikoi taumu e, malamu na kaia mai ganona na heto.

³Dika o ura henia badamu, namo o ura henia maraḡimu, hereva koikoi o ura henia badamu, hereva momokani o ura henia maragimu. (Selah)

⁴Koikoi malana e, hahemase herevadia iboudiai o ura henidiamu.

⁵A Dirava ese baine huarimu ela bona hanaihanai; ia na baine verimu oho, emu kalaga amo baine dadihaimu, mauri taudia edia tano amo baine raḡamu. (Selah)

⁶Kara maoromaoro taudia bae itaia, bena bae gari, bae kirikirilaia, baeto

⁷“Hari Dirava enai se tao tauna mani a itaia; ia ese ena kohu momo e abidadama henia, bona ena taḡa ai mo e helalokau”.

⁸A lau na olive auna mai rauna matamatadia na heto, Dirava ena ruma ai; Dirava ena hebogahisi na abidadama henia hanaihanaimu.

⁹Lau ese baina imodaimu ela bona hanaihanai, badina be oi ese vada o karaia; oi ladamu baina heatolaia, badina ia na namo Dirava e matauraiamu taudia vairadiai.