Salamo 51:1-19

¹Eaubada e, u nuatoatoaegu em gadosisi miatahitahina debana eai, em nuatoatoa lailai didigana debana eai egu awayagara bena u saugabaedi.

²Girugu bena u deurigabaei eo egu baaea arinai oa bena u hea’agu!

³Paana egu awayagara abidi ea ata’o, eo egu baaea hinage huia gamagari eau matagu eai i totoro.

⁴Oa, oabom, ea hebaaeam, saha i baaea oa matam eai, meta ea ginauriyao, arinai em riba se dudurai ariri, eo em hesanapu ribana nige abahegiruna.

⁵Mamohoi baaea boeana eai se labasigu, eo baaea eai hinage sinagu i abigu.

⁶Hedeomi, oa u henua bena ao mamohoi eau nuagu eai; arinai nuagu eamuyamuina eai bena sonoga oa u heatagu.

⁷Hyssop arinai u hea’agu, eau hinage abo arinai ea a’a; oa u deurigu, abo ea posiposi ariri abotai snow.

⁸Kode eo nualolo arinai oa u hemonaugu; siada wa oa u hetagodudi abo se kodelamposi.

⁹Egu baaea bena u hetauyamuidi oa matam eai, agu giru gamagarina bena u saugabaei.

¹⁰Eaubada e, nua a’a oa u hetubu eau nuagu eai, earua harihariuna eo duduraina u tore nuaboeagu eai.

¹¹Oa matam eai tabu u gabahesuaragu eo em Earua Tabuna tabu u abihai arigu eai.

¹²Em abihemauri kodena bena oa u leamauioi, eo earua awaabina bena i bouisinigu.

¹³Abotai tauawayagara em laulau abo ea heatadi, eo tatao baabaaeadi abo se sinibui oa arim eai.

¹⁴Eaubada e, osina giruna arinai bena oa u saguhaigu, oa Eaubada egu mauri paana, eo memenagu oa em abihemauri abo i wana helai.

¹⁵Guiau e, sopagu oa u dabaridi, eo awagu aihelahuim abo i hemasaraha.

¹⁶Paana aitalasam taba nige oa i hekodem; ena aitalasam gabugabuna ea leawa, taba nige nuam i lolo.

¹⁷Aitalasam esega wa Eaubada i henua aririei iaede nua tamotamogoruna, nua tamotamogoruna, dobidobina, Eaubada e, taba nige u isuewaei.

¹⁸Em nualolo debana eai Siona bena oa u helolo; Ierusalema ganana abo u hetorouioidi,

¹⁹abotai aitalasam duduraidi debadi eai abo u nuawoiwoina, aitalasam gabugabudi eo aitalasam gabugabudi maudoidi; bulumakau abo se heaitalasamdi em aitalasam hatahatana eai.