SALAMO 50:5-19

⁵“E abidadama henigumu taudia ba haboudia egu” e tomu, “idia ese boubou karadia e kara, lau ida a herohemaino”.

⁶Guba ese ena kara maoromaoro e gwauraimu, badina be Iehova sibona na hahemaoro tauna. (Selah)

⁷Egu orea taumui e, a hakala, lau baina hereva; Israel e, baina habadelaimu. Lau na Dirava, emui Dirava.

⁸Asina gwau henimuimu emui boubou daidiai; emui ḡole-oho bouboudia na lau vairagu ai nega idoinai.

⁹Boromakau maruanena ta emui ruma amo basina abia, nani maruanena ta emui maḡu amo basina abia dae;

¹⁰badina be uda ḡaudia iboudiai na lauegu, bona ororo daha-ta boromakaudia danu;

¹¹atai manudia iboudiai be dibagu, tano paka ai e laomu ḡaudia iboudiai na egu.

¹²Bama hitolo, umui basinama hamaoromui; badina be tanobada mai anina idoinai ida na lauegu.

¹³Boromakau mamaruanedia hidiodia na animu a? Nani raradia na inumu a?

¹⁴Hahenamo na Dirava ba henia, emui boubou bunai; emui gwauhamata anidia ihamomokanidia na Herea Mikamika ba henia.

¹⁵Hekwakwanai dinana ai lau ba boi henigu; bena lau ese umui baina hamaurimui, bona umui ese lau ba imodaigu.

¹⁶A kara dika taudia na Dirava ese e hereva henidiamu, e tomu: Badina be dahaka egu taravatu o gwauraimu? Dahaka dainai egu gwauhamata herevadia na udumui bibinadia ai mimia?

¹⁷Badina be mata-hakani o inai heniamu, bona egu hereva na murimui ai o negediamu.

¹⁸Henao tauna o itaiamu negana ai o hetura heniamu; bona heuda-hanai taudia o bamodiamu.

¹⁹Hereva dikadia na udumui amo e lasimu, malamui na hereva koikoidia e gwauraimu;