SALAMO 50:1-14

¹Goada-bada Diravana Iehova, vada e hereva, tanobada vada e boiria, dina e daemu gabuna amo ela bona dina e dihomu gabuna.

²Siona, hairai-herea gabuna, amo Dirava diarina e taramu.

³Eda Dirava na e maimu, asine mai kumamu, ia vairanai na lahi hururu-hururuna, lai gubadia ese e gegea ahumu.

⁴Ia ese guba atai ai e boi heniamu, tanobada danu e boi heniamu, ena orea taudia baine hahemaoro henidia totona.

⁵“E abidadama henigumu taudia ba haboudia egu” e tomu, “idia ese boubou karadia e kara, lau ida a herohemaino”.

⁶Guba ese ena kara maoromaoro e gwauraimu, badina be Iehova sibona na hahemaoro tauna. (Selah)

⁷Egu orea taumui e, a hakala, lau baina hereva; Israel e, baina habadelaimu. Lau na Dirava, emui Dirava.

⁸Asina gwau henimuimu emui boubou daidiai; emui ḡole-oho bouboudia na lau vairagu ai nega idoinai.

⁹Boromakau maruanena ta emui ruma amo basina abia, nani maruanena ta emui maḡu amo basina abia dae;

¹⁰badina be uda ḡaudia iboudiai na lauegu, bona ororo daha-ta boromakaudia danu;

¹¹atai manudia iboudiai be dibagu, tano paka ai e laomu ḡaudia iboudiai na egu.

¹²Bama hitolo, umui basinama hamaoromui; badina be tanobada mai anina idoinai ida na lauegu.

¹³Boromakau mamaruanedia hidiodia na animu a? Nani raradia na inumu a?

¹⁴Hahenamo na Dirava ba henia, emui boubou bunai; emui gwauhamata anidia ihamomokanidia na Herea Mikamika ba henia.