SALAMO 44:1-15

¹Dirava e, taiamai amo vada a kamonai, tamamai ese vada e hamaoromai, idia edia dina ai dahaka dahaka o kara, nega gunadia ai.

²Sibomu imamu amo bese idau-idau o luludia lasiva, a idia na o atodia; bese idau-idau oi ese o hahisidiava, a idia na o hamauridia.

³Badina be dia idia sibodia edia dare amo tano e abia, bona dia idia sibodia imadia amo e kwalimu; a oi imamu idibana amo, oi imamu bona oi vairamu diarina amo; badina be oi ese o moalelaidiava.

⁴Oi na egu Pavapava bona egu Dirava; oi ese Iakob ihamaurina vada o gwauraia.

⁵Oi bagumu ai ai inaimai a hadarerediamu, oi ladamu bagunai e tuari henimaimu taudia na baia moimoilaidia.

⁶Badina be dia egu peva asina abidadama heniamu, dia egu dare ese basine hamaurigu;

⁷a oi ese ai inaimai imadia amo vada o hamaurimai, e inai henimaimu taudia vada o haheḡonudia.

⁸Nega idoinai Dirava vada a heaḡilaia; oi ladamu baia imodaia hanaihanai. (Selah)

⁹A oi ese vada o negemai daure, bona vada o hahemaraimai, emai tuari oredia ida asiola.

¹⁰Inaimai vairadiai vada o haloumai; inaimai ese emai kohu vada e dadihai.

¹¹E aladiamu mamoedia heḡereḡeredia ai vada o halaomai, bese idau-idau bogaragidiai vada o hakarohomai rohoroho.

¹²Emu orea taudia na vada o hoidia, dava maraḡi ai, idavalaidia badana na asio tahuamu.

¹³Dekemai taudia ese bae kirikirilaimai taudia ai vada o halaomai, e ḡeḡemai daemu taudia ese bae hevasehalaimai bona bae dadaraimai taudia ai vada o halaomai;

¹⁴bese idau-idau bogaragidiai bae ihi-ihiraimai taudia ai vada o halaomai, orea idau-idau bogaragidiai kwaradia bae taiko-taiko henimai taudia ai vada o halaomai.

¹⁵Dina idoinai egu keto na vairagu ai, hemarai ese vairagu vada e ḡovaia;