Salamo 37:34-40

³⁴GUIAU u bagibagiei, eo ena dobila u abididini, ia hinage abo i abiisinim, eanua abo oa enam; tau laulau gewagewa tauna abo u ita se tomgabaei.

³⁵Tau laulau gewagewa ea ita i gigibori ariri, i sae ariri doha Lebanona maruwaina esau.

³⁶Huia esau ea baeawa ea lau, na hedeomi, ia nei eai nige’e, ea eo’oi komakomani, na taba nige ea lobai.

³⁷Tau nige abahegiruna u italau arinai, eo tau dudurai u ita, manabiga tauna abo ana isimurita.

³⁸Na tau awayagara abo se unuidi, adi isi murita abo se tomgabaedi.

³⁹Tatao duduraidi edi mauri abo se abi GUIAU arinai, huia baea eai edi abahomo ede ia arinai.

⁴⁰GUIAU i saguidi eo i lebohaidi, laulau gewagewa tataodi nimadi eai i lebohaidi eo i hemauridi, paana edi abaailogulogu ede ia arinai.