Salamo 37:12-35

¹²Tau laulau gewagewa i nuatu nonohai bena tau laulau dudurai i heamamna, eo hinage ia arinai moana i taburueahisi;

¹³na Guiau tau baaea i marumaruhiei, paana ie ita ena huia i laolaoma.

¹⁴Tau laulau gewagewa elepa i niusihai, pidu hinage ie tu, bena gogogesagesa tauna i laudobei eo laulau dudurai tataodi bena i unuidi;

¹⁵edi elepa abo i soralau isi isibom nuadi eai, edi pidu abo se hetagodudi.

¹⁶Tau dudurai ena gogo begana mo, i lolo ariri abotai laulau gewagewa tataodi edi gogo lailai didigadi.

¹⁷Paana tau gewagewa nimana abo se godudi, na GUIAU taududurai abo i abiisini.

¹⁸Tatao nige abahegirudi GUIAU edi huia abina i atao, edi gogo hinage abo se ota i lau e nige nosina.

¹⁹Huia piripiri eai taba nige se hetaumaeamaeadi, guriam asubenana eai hinage adi aiai abo i lai ariri.

²⁰Na tatao baabaaeadi abo se tomgabaedi GUIAU ana waiunuyao isi doha oea liasina, se tauyamui— doha asuasu se tautauyamui ariri.

²¹Tau laulau gewagewa ginauri i sagesagenai, na taba nige i hemaisauioi, na tau laulau dudurai ena abi se lolo, to i aiainauia;

²²isi GUIAU i nualoloedi abo oea se abi enadi, na isi i ribahematedi abo se tomgabaedi.

²³Tau lolo ena abalau GUIAU i nuatu nonohai, eo tau wa i nualolo arinai, abo i hetoro komakomani;

²⁴taba ie beu, taba nige i lau ariri, paana GUIAU i abilau nimana eai.

²⁵Egu huia hewari eai i laoma e egu huia tautaubada, sora nige taududurai ea ita se nuagabaei, e nanatunayao falawa se aiaiboda.

²⁶Ia huia gamagari i aiainauiasom, eo ia arinai se sagesagena. eo nanatunayao hinage tatao se henualoloedi.

²⁷Baaea u torohaigabaei, lolo mo u abiwatai, arinai abo u miatahitahi i lau e nige nosina.

²⁸Paana GUIAU abi dudurai mo i gadosisisiei; ena tau miatahitahi tataodi taba nige i nuagabaedi. Tau dudurai abo se ganaganai i lau e nige nosina, na tau gewagewa nanatunayao abo se tomgabaedi.

²⁹Tau dudurai abo oea i abi enana, eo abo arinai i mia i lau e nige nosina.

³⁰Tau dudurai awana eai riba sonoga i hepesadi, memenana abi dudurai i ribaribaedi.

³¹Ena GUIAU ena laugagaeo ia nuana eai; ena abalau eai taba nige i utusagigi.

³²Tau gewagewa tau dudurai i itasipoi, eo i aipate bena i unui.

³³GUIAU taba nige i abigabaei ia nimana gigiborina eai, eo abahedudurai eai taba nige se hegiru.

³⁴GUIAU u bagibagiei, eo ena dobila u abididini, ia hinage abo i abiisinim, eanua abo oa enam; tau laulau gewagewa tauna abo u ita se tomgabaei.

³⁵Tau laulau gewagewa ea ita i gigibori ariri, i sae ariri doha Lebanona maruwaina esau.