Salamo 34:6-22

⁶Gogogesagesa tauna ta ie eoga, to GUIAU ia i ataiei, eo ena amamna gamagaridi aridi eai i hemauri.

⁷GUIAU ena aneru ia tau matausina tataodi i miahetaiiridi eo baaea eai i saguhaidi.

⁸Omi hage au ai’ita, abo au italobai GUIAU i lolo ede! Tausunusunumaena abo nuana i kode!

⁹GUIAU au heasisiei, omi hetabu tataomiu e, paana ia tauheasisiena taba nige ena deha.

¹⁰Liona nanatudiyao se dabu to se guriam, na isi GUIAU tau eo’oina tataodi taba nige ginauri esa lolona se abisapuri.

¹¹Merumeru tatao e, au laoma au ataatai arigu eai, GUIAU heasisina eau abo ea heatamiu.

¹²Aitea tau mauri i henua eo i henua ena mauri asubenadi bena se gamagari, bena lolo amnana i ataiei?

¹³Oa memenam u abididini tabu u riba baaea, sopam hinage borabora ribadi tabu se ribaedi.

¹⁴Laulau gewagewa u tausuaraei, laulau lolo mo u laulauei; loni u eo’oi, eo u miawatai.

¹⁵GUIAU matana se italau laulau dudurai tataodi aridi eai, eo beana se tasoe edi eoga aridi eai.

¹⁶GUIAU ana ao i laeudoiei laulau gewagewa tataodi aridi eai, abahenuaisinidi tanoubu eai i tomgabaedio.

¹⁷Laulau dudurai tataodi ena se eoga GUIAU i ataiedi, edi piripiri gamagaridi eai ia i saguhaidi.

¹⁸Ena tatao se nuaberuberu GUIAU i hanahanauidi, isi nuadi se tamogorugoru ia i hemauridi.

¹⁹Laulau dudurai tauna piripiri gamagaridi i hearodi, na gamagaridi boeadi eai GUIAU i saguhai.

²⁰Ia siadana gamagaridi GUIAU i itawataidi; taba nige esau i tagodu.

²¹Laulau gewagewa tauna baaea eai abo se unuheboso, eo isi laulau dudurai tataodi tauhewaiunuedi abo se ribahematedi.

²²GUIAU ena heaheari tataodi abo i unehaidi, isi wa taubawayamui ia arinai, taba nige esau se ribahemate.