Salamo 33:1-22

¹Au kode ariri GUIAU arinai, omi taulaulau dudurai! Tau dudurai i lolo i aiaihelahui.

²Huelele arinai GUIAU au aihelahui, huelele mainadi saudoudoi aridi eai enana au oioini!

³Wana harihariuna enana au wanai, au oi‐huelele komakomani ma arina lailaimiu!

⁴Paana GUIAU ena riba i dudurai; eo ana paisoa maudoina ie abi ma nuapai’ipai’ina.

⁵I’ila lolo eo laulau dudurai i gadosisiedi; GUIAU ena gadosisi miatahitahina tanoubu i hemonau.

⁶GUIAU ena riba arinai galewa tehana se hetubu, eo ena ginauri gamagaridi ia awana eahuana arinai.

⁷Gabogabo goilana i pei’esegai tupo esega eai, gabogabo ena aba ota eai ie tore.

⁸Tanoubu maudoina bena GUIAU se matausiei, tanoubu taumiaina ia bena se tabutabubuei!

⁹Paana ia ie riba, to ia ede: i lauhesom, abo i taumasaraha.

¹⁰GUIAU eanua gamagaridi taumaiaidi edi sonoga i itasubudi; tatao bodadi edi nuanuatu i guduguduidi.

¹¹GUIAU ena ribahesanapu i otaesegai i lau e nige nosina, ia ena nuatu se miatahitahi isi gamagaridi aridi eai.

¹²Eanua taumiaidi wa se kode ariri taba edi Eaubada ede GUIAU, tatao wa isi i hileidio iabom enanayao.

¹³GUIAU galewa eai i itadobima, tanoubu tataodi gamagaridi i itadi.

¹⁴Ena ababawa telona potana eai i italau tanoubu taumiaina gamagaridi aridi eai,

¹⁵ia wa gamagaridi nuadi ia i hetubudi, eo edi laulau gamagaridi i itasipoidi.

¹⁶Wasawasa esau ena tauiala gamagaridi taba nige se hemauri; tauiala nuakipikipina iabom ena adidiri lailaina eai taba nige i mauri.

¹⁷Iala hosina taba nige i saepoi, eo ena adidiri lailaina eai taba nige i hemauri.

¹⁸Mamohoi GUIAU matana ie lau eai tau matausiena arinai, eo eai to eai ia ena gadosisi otaotahaina se sunumaei,

¹⁹bena earuadi mate eai abo i saguhaidi, eo guriam huiana eai abo i abihemauridi.

²⁰Earuada GUIAU se laubagibagiei, ia ada sagu eo eda opea ede.

²¹Mamohoi, nuada se kode ia arinai, paana ia esana tabuna ta sunusunumaei.

²²GUIAU e, em gadosisi miatahitahina bena i ota ai potamai eai, paana ai ema sunuma ede oa arim eai.