SALAMO 33:1-19

¹Kara namo taumui e, Iehova ba moalelaia; badina be heimodai be ḡau namona, kara maoromaoro taudia ududia ai.

²Hatai-hatai ḡauna maraḡina amo Iehova ba hanamoa, ma badana, varo gwauta ḡauna, ba hataia, ia ihanamolaina.

³Ane matamatana avabia iena; varo ḡaudia ba hatai, ba hatai balaheni, mai lolomui ida.

⁴Badina be Iehova ena hereva na maoromaoro; ena ḡaukara idoinai e karaiamu mai momokanina ida.

⁵Ia ese kara maoromaoro bona hahemaoro e ura henidiamu, tanobada na Iehova ena hebogahisi ai e honu honu daemu.

⁶Iehova ena hereva ese guba e karaia, ia uduna amo e hahodi, bena guba taudia iboudiai e vara.

⁷Ia ese davara ranudia e haboudia, kavabu ai bema haboudia na heto; bona gadobada na e haboudia, roge ai bema haboudia na heto.

⁸Tanobada idoinai ese Iehova garina baine gari, tanobada taudia iboudiai ese ia bae matauraia.

⁹Badina be ia e hereva, bena e hekara; ia e hahedua, bena e gini tutuka-tutuka.

¹⁰Iehova ese bese idau-idau edia henega e hakarohodiamu, orea idau-idau edia lalo-hadai ia ese e laodia ahumu.

¹¹Iehova ena henega e gini hanaihanaimu, bona ena lalo-hadai ela bona uru iboudiai.

¹²Iehova na ena Dirava ai e halaoamu besena be namo; vada e abidia hidi ia dihina ai baela taudia be nanamo.

¹³Iehova na guba amo e roha dobimu, taunimanima natudia iboudiai e nenediamu;

¹⁴terono ai e helaimu gabuna amo e roha laomu. tanobada taudia iboudiai e itadiamu;

¹⁵ia ese idia iboudiai lalodia e karadiamu, edia kara iboudiai danu e itadia taomu.

¹⁶Hanua pavapavana na dia ena tuari oreana badana dainai basine roho mauri; tuari tauna na dia ena goada badana dainai basine mauri.

¹⁷Tuari hosina na mauri e tahuamu tauna ese basine abidadama henia; dia ena goada badana ese tau ta basine hamauria diba.

¹⁸A itaia, Iehova ese ia garina e garimu taudia na e itadiamu; iena hebogahisi e laroamu taudia ia ese e itadia taomu;

¹⁹idia laumadia na mase amo baine harohodia mauri totona, bona doe negana ai baine hamaundia totona.