SALAMO 31:10-23

¹⁰Lalohisihisi dainai egu goada ia ore, bona taitai ese egu mauri ia hakwadogia vadaeni. Egu hisihisi dainai lau manoka lao noho. Egu turiana be idia maragi lao noho.

¹¹Lau idia hadikaia gwauraia taudia ibounai, bona egu badibadinai noho taudia ese, lau idia ura henia lasi, lasi momokani. Egu turana ese lau dekenai idia gari henia noho. Idia ese ariara dekenai lau idia itaia neganai, lau dekena amo idia heau siri.

¹²Taunimanima ibounai ese lau idia laloaboio vadaeni, mase tauna idia laloaboio bamona. Lau be uro, idia hamakohia gauna ta bamona.

¹³Lau idia hadikaia gwauraia taudia momo, edia hereva maragi lau kamonai noho. Kahana ibounai dekena amo, idia ese lau idia hagaria gwauraia, vadaeni idia herevahereva noho, lau do idia hadikaia totona. Egu mauri do idia hadokoa dalana, be idia laloa karaia noho.

¹⁴To Lohiabada e, egu abidadama be oi dekenai lau atoa noho. Oi be egu Dirava.

¹⁵Nega ibounai egu mauri be oi ese oi naria noho. Lau idia hadikaia gwauraia taudia dekena amo, lau do oi hamauria. Lau idia dagedage henia noho taudia dekena amo, lau do oi hamauria.

¹⁶Lau, oiemu hesiai tauna, be mai emu bogahisihisi danu do oi itaia noho. Oiemu noho hanaihanai lalokauna dainai, lau do oi hamauria.

¹⁷Lohiabada e, lau ese oi dekenai lau boiboi noho. Mani emu kara lau do oi durua, vadaeni lau idia hadikaia gwauraia taudia ese, lau do idia halusia lasi. Mani emu kara, kara dika taudia do oi hadikaia, vadaeni mai regena ta lasi, mase taudia edia gabu dekenai do idia diho lao.

¹⁸Koikoi taudia, be mani emu kara edia hereva do oi koua momokani. Hekokoroku taudia, bona edia hereva dekena amo, kara maoromaoro taudia idia hadikaia noho taudia, mani emu kara edia ududia do oi hakapua momokani.

¹⁹Oi dekenai idia gari henia taudia, be oi ese hanamoa bada herea idia dekenai oi henia. Taunimanima ibounai be inai oiemu kara namona idia diba. Bona oi dekenai idia abidadama taudia, be oi ese oi naridia namonamo, inai danu taunimanima idia diba.

²⁰Oi ese oiemu vairana dekenai, mauri gabuna dekenai, inai abidadama taudia oi hunidia noho. Taunimanima edia koikoi karadia dekena amo, oi hunidia noho. Oiemu ruma namona lalonai oi hunidia noho. Idia badu henidia taudia dekena amo oi gimadia noho.

²¹Lohiabada do lau hanamoa noho! Badina lau idia alaia gwauraia taudia ese lau idia hagegea, bona lau idia heatu henia neganai, ia ese mai hoa kara danu, iena lalokau be lau dekenai ia hedinaraia vadaeni.

²²Lau be lau gari, bona lau laloa, “Lohiabada ese iena vairana dekena amo lau ia lulua vadaeni.” To lau ese durua totona lau tai henia neganai, Lohiabada ese egu noinoi ia kamonai henia.

²³Lohiabada dekenai umui abidadama henia taudia ibounai e, Lohiabada do umui lalokau henia. Lohiabada ese abidadama taudia ia gimaia noho, to hekokoroku taudia dekenai, edia kerere davana ia henia noho momokani.