SALAMO 22:12-30

¹²Boromakau mamaruanedia momo ese e ḡeḡegu ahumu, Basan boromakaudia mai goadadia ida ese e kougu heḡeḡemu;

¹³Idia ese ududia e haga henigumu, leona na mai daḡedaḡena ida e ḡoumu na heto.

¹⁴Na aru ohomu ranu na heto, turiagu na e heridemu; kudougu na bada na heto, kemegu ai e veve ohomu.

¹⁵Egu goada na e kaukaumu, ataga na heto, malagu na udugu ai e kaki taomu; mase ḡahuna ai vada o hagorugu diho.

¹⁶Momokani, sisia ese e ḡegegu ahumu; kara dika taudia vada e hebou, vada e kougu ahu; imagu palapaladia bona aegu palapaladia vada e daidia uru,

¹⁷(Turiagu idoinai na ita hedinaraimu). Idia ese e raraigumu, e itagu taomu;

¹⁸egu dabua e hari, egu hahedoki na mari amo e hari.

¹⁹A oi, Iehova e, basio noho dahu ai! Ikahagu e, aoma haraḡa, ba durugu!

²⁰Laumagu na dare amo ba hamauria, egu mauri na sisia ena siahu amo ba rauaia.

²¹Leona uduna amo ba hamaurigu, uda boromakaudia doadia amo lau laumagu ba hamauria.

²²Oi ladamu baina hatoa, tadikakagu vairadiai; baina imodaimu, hebou bogaraginai.

²³Iehova garina o garimu taumui e, ia ba imodaia! Iakob natuna iboumui ai, ia ba heatolaia! Israel natuna iboumui ai, ia ba matauraia!

²⁴Badina be hisi ani tauna ena hisihisi ia ese se dadaraia bona se lalo dika henia; ia vairana na iena amo se hunia, e tai henia negana ai e kamonai.

²⁵Hebou badana ai baina imodaimu; egu gwauhamata anidia baina kara, ia garina e garimu taudia vairadiai.

²⁶Ogoḡami taudia na bae aniani, bogadia bae kunu; e tahuamu taudia ese Iehova bae imodaia. Oi lalomu baine mauri hanaihanai.

²⁷Tanobada dokodia iboudiai na bae helalo tao, bena Iehova bae haḡerea; bese idau-idau edia iduhu iboudiai ese ia bae toma henia diho.

²⁸Badina be basileia na Iehova ena, ia ese bese bese e lohiadiamu.

²⁹Momokani, heaḡi taudia iboudiai tanobada ai ese ia bae toma henia diho; ḡahu ai e dihomu taudia iboudiai na ia vairanai bae igo diho, bona sibona ihamaurina asi dibana tauna danu.

³⁰Garada ese ia isiaina bae lao henia; taunimanima ese uru gabena na Iehova sivaraina bae hamaorolaidia;