Salamo 145:4-21

⁴Isi esau isi esau aridi eai am paisoa abo se hedebasaei, em gigibori laulaudi se ribahemasarahadi.

⁵Em wasawasa ana ao lolona eo em gigibori namanamarina, eau nuagu eai abo ea nuanuatuidi.

⁶Oa em laulau matamatausidi ma gigiboridi, tatao abo se ribahemasarahadi, eo em abiabi saesaedi abo ea guguiaei.

⁷Oa em abilolo saesaena wasana abo se ribaribaei, em laulau duduraidi abo se wanawanaidi.

⁸GUIAU ena ainauia i lai ariri eo ena nuatoatoa hinage, ena ouyalayala nige i heula, ena gadosisi miatahitahina hinage i lai ariri.

⁹GUIAU ena abi se lolo tatao gamagaridi aridi eai, eo ginauri gamagaridi ia i hetubudi meta i nuatoatoaedi.

¹⁰GUIAU e, nimam ginauridi gamagaridi wa abo se lautoiem, em taumiatahitahi tataodi gamagaridi abo se ribatausaem!

¹¹Em basileia namanamarina abo se ribaei, eo em gigibori hinage,

¹²tatao nanatudiyao em gigibori laulaudi abo se heatadi, eo em basileia ena namanamari hinage.

¹³Oa em basileia miatahitahi basileiana, em tanutanuagaimai i laulau hari isi to hari isi. GUIAU ena riba gamagaridi i hemamohoiedi, eo ena nuatoatoa i laulau ena abiabi gamagaridi aridi eai.

¹⁴Taubeu gamagaridi GUIAU i abi’isinidi, eo tatao dageladi se eou i abihetorodi.

¹⁵Mata gamagaridi se italaowa oa arim eai, eo oa adi aiai taumosedi huiana mamohoina eai.

¹⁶Oa nimam ue ala, ginauri gamagaridi edi henuhenua u mosedi.

¹⁷GUIAU ena laulau gamagaridi se dudurai, eo ena abi gamagaridi ma nuatoatoana.

¹⁸GUIAU tatao gamagaridi taueogalau i hanahanau‐aririedi, isi wa mamohoina eai taueogalau.

¹⁹Ia tauheasisiena tataodi gamagaridi i itawataidi, edi dou hinage i ataiei, eo i hemauridi.

²⁰GUIAU taugadosisiena tataodi gamagaridi i itawataidi; na laulau gewagewa tataodi abo i unuheohidi.

²¹Awagu eai GUIAU hedebasaena abo ea ribaei, buluma eai tatao gamagaridi ia esana tabuna taba se ribatausaei, i lau e huia nige nosina.