SALAMO 143:2-10

²Lau, oiemu hesiai tauna do oi kota henia lasi, badina be idia mauri noho taudia ibounai edia huanai, ta be ia maoromaoro lasi oiemu vairana dekenai.

³Lau ia hadikaia gwauraia tauna ese lau ia lulua, bona ia ese lau ia halusia momokani vadaeni. Ia ese dibura ruma lalonai lau ia koua vadaeni, bona egu noho be idaunegai idia mase vadaeni taudia bamona.

⁴Unai dainai egu lalona ia metau dainai, lau ese laloa dika lau davaria vadaeni. Egu lalona ia hisihisi, dika momokani, mai gari danu.

⁵Dina gunadia lau laloa noho. Oiemu kara gunadia ibounai lau laloa noho. Oiemu imana edia kara badadia ibounai lau laloatao noho.

⁶Unai neganai egu imana lau abia isi, oi dekenai lau guriguri. Egu lauma be oi totona ia ranu mase, tano kaukau be medu totona ia ranu mase bamona.

⁷Lohiabada e, lau dekenai do oi haere haraga, badina be egu lauma ia manoka momokani, mase bamona. Oiemu vairana be lau dekena amo do oi hunia lasi. Bema unai bamona oi karaia, lau be mase gabuna idia lao noho taudia danu do ai diho lao.

⁸Lohiabada e, lau ese oi lau abidadama henia noho. Unai dainai daba ibounai lau do oi durua, vadaeni oiemu noho hanaihanai lalokauna do lau laloa noho. Guriguri dekena amo egu lauma oi dekenai lau abia isi noho. Unai dainai egu lao dala namona, mani lau dekenai do oi hedinaraia.

⁹Lohiabada e, lau idia hadikaia gwauraia taudia dekena amo lau do oi hamauria, badina oi sibona be egu hunia gabuna.

¹⁰Oi be lauegu Dirava. Unai dainai oiemu ura ena kara, be lau dekenai mani do oi hadibaia. Lau ura oiemu Lauma ese lau do ia hakaua, vadaeni dala namona, bona mai maurina dekenai do lau raka.