SALAMO 135:1-17

¹Iehova ba imodaia. Iehova ladana ba imodaia; umui Iehova ena hesiai taumui, heimodai ba henia,

²umui Iehova ena ruma ai o ginimu taumui, iseda Dirava ena ruma maḡudia ai o ginimu taumui.

³Iehova ba imodaia, badina be Iehova na namo; ia ladana ba heatolaia emui ane ai, badina be ia na mai ena harihari-bada.

⁴Badina be Iehova ese Iakob vada e abia hidi, ia sibona ena; Israel na iena korikori.

⁵Badina be lau dibagu Iehova na bada; eda Ḡaubada ese dirava iboudiai e hereadiamu.

⁶Badina be Iehova na sibona ena ura e karamu, guba ai bona tanobada ai, bona davara ai bona dobu gabudia iboudiai.

⁷Ia ese ori e hadaediamu, tanobada dokona amo; bona kevaru e karaiamu, medu ena, bona lai na ena roge amo e halasidiamu.

⁸Ia ese Aigupto ai natu-roboadia e aladia mase, taunimanima natudia roboadia bona boroma natudia roboadia.

⁹Aitupto e, oi bogaragimu ai, ia ese toa bona hoa karadia e siaidia, Farao bona ena hesiai taudia iboudiai ihadikadia.

¹⁰Ia ese bese momo e habuadia tari, bona pavapava mai siahudia e aladia mase:

¹¹Sihon, Amoro taudia edia pavapava, bona Og, Basan pavapavana, bona Kanaan basileiadia iboudiai.

¹²Edia tano e heni lao, haida ese e ḡaunaia, ena orea taudia Israel ese e ḡaunaia.

¹³Iehova e, oi ladamu na e hesiriu hanaihanaimu; Iehova e, oi harimu na laḡani laḡani e miamu.

¹⁴Badina be Iehova ese ena orea taudia na maorodia baine gwaurai, bona ena hesiai taudia na baine bogadia hisi.

¹⁵Bese idau-idau edia kaivakuku na silver bona gold amo e karadiamu, taunimanima imadia karakaradia:

¹⁶mai ududia, to asie herevamu; mai matadia, to asie itamu;

¹⁷mai taiadia, to asie kamonaimu; bona asi laḡadia ududia ai.