Salamo 132:1-18

¹GUIAU e, bena Davida u nuatui ma nualolom, lauita oioiuradi gamagaridi i hearodi;

²ie riba aigora GUIAU arinai eo i ribahesunuma Iakobo ena Eaubada Gigiborina arinai,

³“Taba nige ea awasae egu numa eai eo taba nige ea lau egu abaeno eai;

⁴taba nige matagu ea hegibudi, eo taba nige matagu se enoeno.

⁵na GUIAU ena numa abahetorona ea eooi i lau e ea lobai. Iakobo ena Eaubada Gigiborina ena abamia.”

⁶Ai ataiei Eparata eai, ai lobai Ia’ara ena oea eai.

⁷“I lolo ta lau ena aba mia eai; aena ana bou arinai ta tabaohu!”

⁸U toro, GUIAU e, u lau em aba aiyawasi dimona eai, oa, eo em gigibori akena maem.

⁹Em kohena bena laulau dudurai se luidi, eo tatao tabudi abo se wowo ma kodedi,

¹⁰Em heaheari tauna Davida debana eai oa em heyausi tauna tabu u otaotaei.

¹¹GUIAU aigora mamohoina i aigoraei Davida arinai eo ena riba wa i ota esegai: “Oa natum tau esau, oa taum eai i laoma, abo ea hebawa em terona potana eai.

¹²Taba nanatumyao tatao egu ribahesunuma se sogohididini eo egu riba tabudi ea heatadi wa hinage, isi nanatudiyao oa em terona potana eai abo se bawa i lau e huia nige nosina.”

¹³Paana ede GUIAU Siona i abihineri, i gadohiei abo ena aba miahai:

¹⁴“Inata ede egu aba aiyawasi i lau e huia nige nosina; inai abo ea miatahitahi, paana ea gadohiei.

¹⁵Ana aiai abo ea helai aririei; ena gogogesagesa tataodi aiai eai abo ea hebogasesedi.

¹⁶Ena kohena mauri arinai abo ea heluidi, ena taumiatahitahi tataodi abo se wowo makodedi.

¹⁷Nei eai abo dona esau ea he’ini Davida enana; lamepa ea abinonohai egu heyausi tauna enana.

¹⁸Ana waiunuyao mo abo ea heluidi taumaeamaea arinai, na ia iabom uruna eai ena korona namanamarina abo i sina.”