Text copied!
CopyCompare
Buka Helaga - SALAMO - SALAMO 119

SALAMO 119:58-136

Help us?
Click on verse(s) to share them!
58Mai egu kudouna ibounai danu oi dekenai lau noinoi inai, lau do oi hanamoa. Lau do oi bogahisihisi henia, oiemu gwauhamata hegeregerena.
59Lau ese egu mauri ena dala lau tahua, bona lau laloa momo vadaeni, bona unai negadia ibounai, oiemu hadibaia hereva dekenai lau giroa lou.
60Lau naria kava lasi, to karaharaga oiemu oda hereva lau kamonai henia.
61Kara dika taudia ese lau idia veria toho, edia kara be lau danu do lau karaia totona. To lau ese oiemu taravatu lau laloaboio lasi.
62Hanuaboi momokani neganai lau toreisi noho, oi do lau hanamoa totona, badina oi ese kota hereva maoromaoro oi gwauraia noho.
63Oi dekenai idia gari taudia, bona oiemu taravatu idia badinaia taudia ibounai be egu turana taudia.
64Lohiabada e, tanobada be oiemu noho hanaihanai lalokauna dekenai ia honu noho. Oiemu taravatu lau dekenai mani do oi hadibaia.
65Lohiabada e, lau, oiemu hesiai tauna dekenai kara namo oi karaia vadaeni. Oi ese oiemu gwauhamata oi hamomokania vadaeni.
66Aonega bona lalona kehoa be lau dekenai do oi hadibaia, badina be oiemu taravatu lau abidadama henia noho.
67Matakani ena hisihisi lau do abia lasi neganai, lau ese oiemu dala dekena amo lau raka siri, to harihari oiemu hereva lau kamonai henia noho.
68Oi be namo, bona oiemu kara danu be namo. Oiemu taravatu mani lau dekenai do oi hadibaia.
69Hekokoroku taudia ese, hereva koikoi dekena amo lau idia hadikaia noho, to lau ese oiemu hadibaia hereva lau kamonai henia, mai egu kudouna ibounai danu.
70Inai taudia edia kudoudia be auka, bona mai edia lalona kehoa lasi, to lau ese oiemu taravatu lau moalelaia noho.
71Oiemu matakani ena hisihisi lau abia, be lau dekenai ia namo bada, badina be unai matakani dainai oiemu taravatu lau tahua, bona ena namo lau davaria.
72Oiemu uduna hereva ena taravatu be namo herea lau dekenai. Golo bona siliva momo herea, be oiemu taravatu ese ia hereaia momokani.
73Lohiabada e, oiemu imana ese lau idia karaia, bona oi ese lau oi naria noho. Mani emu kara lalona kehoa lau dekenai do oi henia, vadaeni oiemu taravatu edia anina do lau davaria.
74Vadaeni oi dekenai idia gari noho taudia ese, lau idia itaia neganai do idia moale, badina be oiemu hereva lau abidadama henia noho momokani.
75Lohiabada e, lau diba oiemu taravatu be maoromaoro. Bona lau diba oi ura lau do oi hamaoromaoroa dainai, oi ese matakani ena hisihisi lau dekenai oi siaia, badina oiemu taudia oi naria kara, be mai maoromaoro, bona momokani danu, bona nega ibounai oiemu kara be idau lasi.
76Mani emu kara oiemu noho hanaihanai lalokauna dekena amo, lau do oi hagoadaia, badina be lau, oiemu hesiai tauna dekenai, oi ese unai bamona oi gwauhamata vadaeni.
77Lau dekenai oiemu bogahisihisi do oi henia, vadaeni do lau mauri noho, badina be oiemu taravatu dekenai lau moale noho.
78Hekokoroku taudia ese lau idia samania koikoi noho. Mani emu kara oi ese idia do oi koua, vadaeni do idia hemarai momokani. To lau ese oiemu hadibaia hereva do lau laloa noho.
79Dirava dekenai idia gari, bona oiemu taravatu ena anina idia diba taudia, be mani lau dekenai do idia mai.
80Lohiabada e, mani emu kara lau do oi durua, oiemu taravatu do lau naria namonamo momokani, kerere ta lasi, vadaeni hemarai be do lau abia diba lasi.
81Lohiabada e, egu lauma ese oiemu hamauria ia ura henia bada herea noho, bona egu goada be ia ore momokani. To lau ese oiemu hereva lau abidadama henia noho.
82Oiemu gwauhamata lau naria noho dainai, egu matana idia manoka lao noho, bona lau tai noho, lau gwau, “Edena negai oi ese lau do oi durua?”
83Lau be dika vadaeni, uaina udaia nanigosi kopina, ia makohia dainai idia negea ore gauna bamona, to lau ese oiemu taravatu lau laloaboio lasi.
84Lohiabada e, lau, oiemu hesiai tauna, be do lau naria noho ela bona edena negai? Edena negai lau idia dagedage henia taudia edia dika davana, be do oi henia?
85Hekokoroku taudia, oiemu taravatu idia kamonai henia lasi taudia, ese hunia dekenai lau hadikaia totona dalana idia karaia noho.
86Lohiabada e, oiemu taravatu ibounai be ai abidadama henia diba. Mani lau do oi durua, badina tau haida ese, lau hadikaia totona hereva koikoi idia gwauraia noho.
87Idia ese kahirakahira lau idia alaia, to lau ese oiemu taravatu lau rakatania lasi.
88Oiemu noho hanaihanai lalokauna dainai, mani lau do oi naria namonamo. Unai neganai lau ese oiemu taravatu do lau kamonai henia.
89Lohiabada e, oiemu hereva be do ia noho ela bona hanaihanai. Ia be guba dekenai ia gini goada noho.
90Oiemu hereva be mai maoromaoro bona momokani danu oi badinaia, bona do oi badinaia noho ela bona hanaihanai. Oi ese tanobada oi karaia, bona ia gini goada noho.
91Oi sibona oi hereva, vadaeni gau ibounai idia noho, ia mai bona hari danu, badina be gau ibounai bona taunimanima ibounai ese, oiemu gaukara idia karaia noho.
92Bema oiemu taravatu lau moalelaia lasi neganai, egu hisihisi ese lau do ia hamasea momokani.
93Lau ese oiemu taravatu do lau rakatania lasi, badina idia dekena amo oi ese lau oi hamauria.
94Lohiabada e, lau be oiemu, mani lau do oi hamauria, badina lau ese oiemu hadibaia hereva lau tahua namonamo vadaeni.
95Kara dika taudia be hunia dekenai lau idia naria noho, lau do idia alaia gwauraia, to lau ese oiemu oda hereva lau laloa noho.
96Lau be hari lau diba, tanobada dekenai ia noho gauna ta, be ia namo momokani diba lasi, to oiemu taravatu sibona be ia namo herea momokani.
97Lohiabada e, oiemu taravatu lau ura henia. Dina ena hora ibounai lalonai, oiemu taravatu lau laloa noho.
98Oiemu taravatu be lau dekenai ia noho nega ibounai, bona ia ese aonega lau dekenai ia henia noho. Inai aonega ese, lau dekenai idia tuari taudia edia aonega ia hereaia.
99Lauegu diba ese, egu hadibaia taudia ibounai edia diba ia hereaia noho, badina be lau ese Dirava ena hadibaia hereva lau laloa noho, ma lau laloa noho.
100Bona egu aonega ese tau buruka edia aonega ia hereaia noho, badina be oi Dirava, oiemu oda hereva lau badinaia noho.
101Lau ese kara dikadia dekena amo lau raka siri noho, badina be lau ura Dirava ena hereva do lau kamonai henia.
102Lohiabada e, oiemu hadibaia hereva dekena amo lau raka siri lasi, badina be oi sibona ese, oiemu hereva lau dekenai oi hadibaia noho.
103Lauegu uduna dekenai hani ena mamina be namo momokani, to Dirava e, oiemu hereva ena mamina ese hani ena mamina ia hereaia noho.
104Lohiabada e, oiemu taravatu ese ura namodia lau dekenai ia henia noho. Unai dainai kara dikadia ibounai lau ura henia lasi.
105Lohiabada e, oiemu hereva be lamepa bamona, lau ia hakaua noho, vadaeni lau raka maoromaoro diba. Oiemu hereva be diari, ia ese egu dala ia hadiaria noho.
106Lau ese lau gwauhamata vadaeni, oiemu hadibaia hereva maoromaorona do lau badinaia, vadaeni inai gwauhamata do lau makohia lasi momokani.
107Lohiabada e, egu hisihisi be dika momokani. Oiemu gwauhamata hegeregerena oi ese lau do oi hamauria.
108Lohiabada e, lau be oi dekenai lau guriguri, bona oi dekenai lau tanikiu henia. Lauegu tanikiu mani oi abia dae, bona oiemu oda hereva lau dekenai do oi hadibaia.
109Nega ibounai mase be kahirakahira lau dekenai, to lau ese oiemu taravatu hereva lau laloaboio lasi.
110Kara dika taudia ese tarapu idia atoa, lau do idia hadikaia totona, to lau ese oiemu hadibaia hereva lau rakatania lasi.
111Oiemu oda hereva be nega ibounai lau dogoatao noho, badina inai hereva be egu kudouna ena moale gauna.
112Lau ese lau gwauhamata vadaeni, oiemu taravatu do lau kamonai henia noho, ela bona do lau mase.
113Lohiabada e, oiemu murina dekenai idia raka koikoi taudia, be lau ura henidia lasi, to lau ese oiemu taravatu lau ura henia noho.
114Oi sibona ese egu mauri oi naria bona gimaia noho. Lau ese oiemu hereva lau hamomokania, bona lau abidadama henia noho.
115Umui kara dika taudia e, lau dekena amo do umui raka siri, badina lau ese Dirava ena taravatu lau ura badinaia.
116Lohiabada e, oi gwauhamata vadaeni, goada lau dekenai do oi henia. Inai goada do oi henia, vadaeni do lau mauri noho.
117Lohiabada e, oi ese lau do oi dogoatao, vadaeni mauri do lau abia, bona lau ese oiemu oda hereva do lau badinaia nega ibounai.
118Oiemu taravatu idia kamonai henia lasi taudia, be oi ese oi negea. Idia edia koikoi karadia be anina lasi.
119Oi ese kara dika taudia oi laloa be momoru sibona. Unai dainai lau ese oiemu hadibaia hereva lau ura henia noho.
120Lohiabada e, oi garina lau gari noho. Oiemu kota henia karadia lau laloa neganai, lau gari.
121Lau ese kara maoromaoro bona kara namo lau karaia vadaeni, unai dainai mani emu kara lau do oi naria, lau idia alaia gwauraia taudia ese lau do idia hadikaia lasi.
122Lau, oiemu hesiai tauna, egu mauri mani do oi hamauria. Lau do oi naria, vadaeni hekokoroku taudia ese lau do idia hisihisi henia lasi.
123Egu matana idia dibura-dibura, oiemu hamauria lau tahua dainai, bona oiemu gwauhamata maoromaorona lau naria noho dainai.
124Oiemu noho hanaihanai lalokauna hegeregerena, mani lau do oi durua, bona oiemu taravatu ena anina lau dekenai do oi hadibaia.
125Lau be oiemu hesiai tauna dainai, lau dekenai oiemu aonega do oi henia, vadaeni oiemu hadibaia hereva be do lau diba.
126Lohiabada e, taunimanima ese oiemu taravatu idia utua noho. Edia kerere davana do oi henia ena nega ia ginidae vadaeni.
127Oiemu oda hereva lau lalokau henia bada, to golo lau ura henia sisina. Io, oiemu oda edia namo ese golo namo herea ia hereaia.
128Unai dainai oiemu oda ibounai lau gwauraia be maoro. Dala koikoi ibounai be lau ura lasi momokani.
129Lohiabada e, oiemu hadibaia hereva be namo herea momokani. Unai dainai mai egu kudouna ibounai danu, idia dekenai lau kamonai henia noho.
130Oiemu hereva hadibaia kara ese diari ia havaraia noho, bona oiemu hereva dekena amo, diba lasi taudia ese aonega idia davaria.
131Lohiabada e, oiemu hereva lau ura henia dikadika noho. Unai dainai egu kudouna ia toreisi, oiemu hereva do lau badinaia totona.
132Lau dekenai do oi laloa, bona lau dekenai do oi bogahisihisi henia, badina oi ese inai bamona oi karaia noho, oi idia lalokau henia taudia ibounai dekenai.
133Oiemu gwauhamata hegeregere, lau do oi naria, vadaeni kara dika dekenai do lau moru lasi. Oi durua lau, vadaeni dika ese lau do ia halusia lasi.
134Tau haida ese lau idia hadikaia gwauraia noho. Idia dekena amo lau do oi hamauria. Unai neganai lau ese oiemu oda hereva, be do lau kamonai henia diba.
135Lohiabada e, mani lau kahirakahira do oi noho. Oiemu taravatu lau dekenai do oi hadibaia, bona oi ese lau do oi hanamoa.
136Lauegu matana ena ranu be sinavai ranu bamona ia diho, badina be taunimanima momo ese, oiemu taravatu idia kamonai henia lasi noho.

Read SALAMO 119SALAMO 119
Compare SALAMO 119:58-136SALAMO 119:58-136