SALAMO 119:42-77

⁴²Unai neganai lau ese lau idia hereva dika henia taudia, be do lau haere henia diba, badina be lau ese oiemu hereva lau abidadama henia noho.

⁴³Mani lau do oi durua, vadaeni nega ibounai hereva momokani do lau gwauraia, badina be oiemu kota hereva lau abidadama henia noho.

⁴⁴Lau ese nega ibounai oiemu taravatu do lau kamonai henia noho, ela bona hanaihanai.

⁴⁵Lau ese oiemu hadibaia hereva lau tahua momokani dainai, gau ta ese egu dala do ia koua diba lasi, lasi momokani.

⁴⁶Oiemu taravatu be king taudia dekenai do lau gwauraia, bona inai kara dekenai lau be do lau hemarai lasi.

⁴⁷Oiemu oda hereva lau kamonai henia noho, mai egu moale bada danu, badina be oiemu oda lau ura henia noho.

⁴⁸Oiemu oda hereva be lau ese lau matauraia, bona lau ura henia danu. Oiemu hadibaia hereva be do lau laloa noho.

⁴⁹Lohiabada e, lau, oiemu hesiai tauna dekenai oi henia gwauhamata, be mani do oi laloatao. Inai gwauhamata lau abidadama henia dainai, egu lalona ia moale.

⁵⁰Hisihisi ese lau ia abia neganai goada lau davaria lou, badina oiemu gwauhamata ese, mauri matamata lau dekenai ia henia.

⁵¹Hekokoroku taudia be, nega ibounai lau dekenai idia hereva dika henia, to lau ese oiemu taravatu lau rakatania lasi.

⁵²Lohiabada e, oiemu oda hereva gunadia lau laloatao, bona idia ese lau idia hagoadaia.

⁵³Lau ese dika taudia lau itaia, idia ese oiemu taravatu idia utua noho. Unai lau itaia neganai egu lalona ia badu momokani.

⁵⁴Edena gabu, edena gabu dekenai lau noho, oiemu taravatu be egu ane edia anina.

⁵⁵Lohiabada e, hanuaboi lalonai lau ese oi lau laloatao noho, bona oiemu taravatu lau laloa noho.

⁵⁶Lau ese oiemu oda hereva lau badinaia noho, bona inai kara ese lau ia hamoalea momokani.

⁵⁷Lohiabada e, oi sibona lau ura henia noho. Lau ese lau gwauhamata vadaeni, oiemu taravatu do lau kamonai henia.

⁵⁸Mai egu kudouna ibounai danu oi dekenai lau noinoi inai, lau do oi hanamoa. Lau do oi bogahisihisi henia, oiemu gwauhamata hegeregerena.

⁵⁹Lau ese egu mauri ena dala lau tahua, bona lau laloa momo vadaeni, bona unai negadia ibounai, oiemu hadibaia hereva dekenai lau giroa lou.

⁶⁰Lau naria kava lasi, to karaharaga oiemu oda hereva lau kamonai henia.

⁶¹Kara dika taudia ese lau idia veria toho, edia kara be lau danu do lau karaia totona. To lau ese oiemu taravatu lau laloaboio lasi.

⁶²Hanuaboi momokani neganai lau toreisi noho, oi do lau hanamoa totona, badina oi ese kota hereva maoromaoro oi gwauraia noho.

⁶³Oi dekenai idia gari taudia, bona oiemu taravatu idia badinaia taudia ibounai be egu turana taudia.

⁶⁴Lohiabada e, tanobada be oiemu noho hanaihanai lalokauna dekenai ia honu noho. Oiemu taravatu lau dekenai mani do oi hadibaia.

⁶⁵Lohiabada e, lau, oiemu hesiai tauna dekenai kara namo oi karaia vadaeni. Oi ese oiemu gwauhamata oi hamomokania vadaeni.

⁶⁶Aonega bona lalona kehoa be lau dekenai do oi hadibaia, badina be oiemu taravatu lau abidadama henia noho.

⁶⁷Matakani ena hisihisi lau do abia lasi neganai, lau ese oiemu dala dekena amo lau raka siri, to harihari oiemu hereva lau kamonai henia noho.

⁶⁸Oi be namo, bona oiemu kara danu be namo. Oiemu taravatu mani lau dekenai do oi hadibaia.

⁶⁹Hekokoroku taudia ese, hereva koikoi dekena amo lau idia hadikaia noho, to lau ese oiemu hadibaia hereva lau kamonai henia, mai egu kudouna ibounai danu.

⁷⁰Inai taudia edia kudoudia be auka, bona mai edia lalona kehoa lasi, to lau ese oiemu taravatu lau moalelaia noho.

⁷¹Oiemu matakani ena hisihisi lau abia, be lau dekenai ia namo bada, badina be unai matakani dainai oiemu taravatu lau tahua, bona ena namo lau davaria.

⁷²Oiemu uduna hereva ena taravatu be namo herea lau dekenai. Golo bona siliva momo herea, be oiemu taravatu ese ia hereaia momokani.

⁷³Lohiabada e, oiemu imana ese lau idia karaia, bona oi ese lau oi naria noho. Mani emu kara lalona kehoa lau dekenai do oi henia, vadaeni oiemu taravatu edia anina do lau davaria.

⁷⁴Vadaeni oi dekenai idia gari noho taudia ese, lau idia itaia neganai do idia moale, badina be oiemu hereva lau abidadama henia noho momokani.

⁷⁵Lohiabada e, lau diba oiemu taravatu be maoromaoro. Bona lau diba oi ura lau do oi hamaoromaoroa dainai, oi ese matakani ena hisihisi lau dekenai oi siaia, badina oiemu taudia oi naria kara, be mai maoromaoro, bona momokani danu, bona nega ibounai oiemu kara be idau lasi.

⁷⁶Mani emu kara oiemu noho hanaihanai lalokauna dekena amo, lau do oi hagoadaia, badina be lau, oiemu hesiai tauna dekenai, oi ese unai bamona oi gwauhamata vadaeni.

⁷⁷Lau dekenai oiemu bogahisihisi do oi henia, vadaeni do lau mauri noho, badina be oiemu taravatu dekenai lau moale noho.