Text copied!
CopyCompare
Buka Helaga - SALAMO - SALAMO 119

SALAMO 119:144-176

Help us?
Click on verse(s) to share them!
144Oiemu hadibaia hereva be nega ibounai idia maoromaoro. Mani emu kara oiemu hereva dekena amo, diba bona aonega lau dekenai do oi henia, vadaeni mauri do lau davaria.
145Lohiabada e, mai egu kudouna ibounai danu oi dekenai lau boiboi. Lau dekenai mani do oi haere, bona lau ese oiemu taravatu do lau kamonai henia.
146Lohiabada e, oi dekenai lau boiboi noho, be mani lau do oi hamauria, vadaeni oiemu hadibaia hereva do lau badinaia.
147Daba rere do lasi neganai, oiemu durua totona oi dekenai lau tai henia. Oiemu hereva dekenai lau abidadama henia noho.
148Hanuaboi ena nega ibounai lalonai lau noga noho, lau mahuta lasi, badina oiemu hadibaia hereva lau laloa noho.
149Oiemu lalokau be ia noho hanaihanai dainai, Lohiabada e, mani lau do oi kamonai henia. Oiemu bogahisihisi mani do oi hedinaraia, bona egu mauri do oi hamauria.
150Lau dekenai idia badu henia, bona lau dekenai idia dagedage henia taudia, be lau dekenai kahirakahira idia raka mai noho. Idia ese oiemu taravatu idia badinaia lasi momokani.
151To oi Lohiabada, oi be lau kahirakahira oi noho, bona oiemu taravatu ibounai be momokani.
152Nega daudau ia lao vadaeni, lau ese oiemu hadibaia hereva lau tahua bona lau diba. Oi ese idia oi haginia, bona do idia noho hanaihanai.
153Lohiabada e, egu hisihisi do oi itaia, bona lau do oi hamauria, badina be oiemu taravatu lau laloaboio lasi.
154Taunimanima edia vairana dekenai, egu hereva mani do oi durua, bona lau do oi hamauria. Lau dekenai mauri do oi henia, oiemu gwauhamata hegeregerena.
155Kara dika taudia, be oiemu hamauria do idia davaria lasi, badina oiemu taravatu idia kamonai henia lasi.
156To Lohiabada e, oiemu bogahisihisi be bada herea. Oiemu bogahisihisi mani do oi hedinaraia, bona lau do oi hamauria.
157Lau idia hadikaia bona dagedage henia gwauraia taudia be momo, to oiemu taravatu badinaia kara dekena amo lau raka siri lasi.
158Edia abidadama idia rakatania taudia lau itaia neganai, lau ura henidia lasi momokani, badina be oiemu taravatu idia kamonai henia lasi.
159Lohiabada e, do oi laloa, lau ese oiemu hadibaia hereva lau ura henia bada noho. Oiemu lalokau be ia idau diba lasi dainai, mani lau do oi hamauria.
160Oiemu hereva ibounai edia anina be momokani, bona oiemu kota hereva ibounai be maoromaoro, ela bona hanaihanai.
161Lohia taudia ese lau idia dagedage henia noho, badina ta lasi, to oiemu taravatu lau matauraia noho.
162Oiemu gwauhamata dainai lau be moale bada. Egu moale be moni bada ia davaria tauna ena moale hegeregerena.
163Lau ese koikoi lau ura henia lasi momokani, mai egu badu danu, to oiemu taravatu lau lalokau henia noho.
164Dina ta ta lalonai, nega 7 lau ese oiemu ladana lau hanamoa noho, oiemu kota maoromaoro dainai.
165Lohiabada e, oiemu taravatu idia ura henia noho taudia ese, maino namo herea idia abia noho, bona gau ta ese do ia hamorudia diba lasi.
166Lohiabada e, oiemu hamauria totona oi dekenai lau naria noho, mai egu abidadama danu, bona oiemu oda lau badinaia noho.
167Oiemu hadibaia hereva lau kamonai henia noho, badina mai egu kudouna ibounai idia lau lalokau henia bada noho.
168Oiemu oda bona oiemu hadibaia hereva lau kamonai henia noho, badina be oi ese egu kara ibounai oi itaia noho.
169Lohiabada e, mani egu taitai oi dekenai do oi abia dae. Laloa kehoa lau dekenai do oi henia, oiemu gwauhamata hegeregerena.
170Egu noinoi mani do oi kamonai henia, bona lau do oi hamauria, oiemu gwauhamata hegeregerena.
171Lau ese oi do lau hanamoa noho hanaihanai, badina be oi ese oiemu taravatu lau dekenai oi hadibaia noho.
172Oiemu taravatu dainai ane do lau abia, badina be oiemu oda herevadia be maoromaoro.
173Mani lau durua totona do oi noho hegaegae nega ibounai, badina oiemu taravatu edia dala dekenai lau raka noho.
174Lohiabada e, oiemu hamauria ena durua totona oi dekenai lau laloa noho, mai egu lalokau bada danu. Oiemu taravatu dekena amo moale lau davaria noho.
175Lau dekenai mauri do oi henia, oi do lau hanamoa noho diba totona. Oiemu hadibaia hereva dekena amo lau do oi durua.
176Lau be lau loaloa kava noho, ia boio vadaeni mamoe bamona. Unai dainai mani emu kara lau, oiemu hesiai tauna, do oi tahua, badina be oiemu taravatu lau laloaboio lasi.

Read SALAMO 119SALAMO 119
Compare SALAMO 119:144-176SALAMO 119:144-176