Sabóor 9:1-20

¹Mu jëm ci njiital jàngkat yi, dëppook galan bu ñuy wax Deewug doom ju góor, ñeel Daawuda, di kàddug Sabóor.

²Ma sante Aji Sax ji sama xol bépp, di siiwal mboolemi kéemaanam.

³Yaw Yàlla, dama lay bége, bànneexoo la, woy la, yaw Aji Kawe ji.

⁴Noon yeey dellu gannaaw, tërëf, sànku fi sa kanam.

⁵Yaa ma àtte yoon, dëggal ma, toog ci sab jal, di àtte njub.

⁶Rëbb nga xeet yi, sànk ñu bon ñi, far seeni tur ba fàww.

⁷Noon ya raaf, gental ba fàww. Yaa déjjati seeni dëkk, seenu askan fey.

⁸Aji Sax jee sax dàkk, samp jalam ngir àtte.

⁹Moom mooy àtte àddina cig njub, di dogalal xeet yi dëgg.

¹⁰Aji Sax jeey làq néew-ji-doole, mooy làqe bésub njàqare.

¹¹Aji Sax ji, yaw, ku la xam, wóolu la. Aji Sax ji, yaw, ku lay sàkku, doo ko wacc.

¹²Woyleen Aji Sax ji dëkke Siyoŋ, siiwal-leen ay jalooreem ci xeet yi!

¹³Mooy topp nit bakkanu moroomam, di ko ba xel, te du fàtte yuuxi néew-ji-doole.

¹⁴Éy Aji Sax ji, baaxe ma, gisal naqar wi ma bañ yi teg. Yaa may yékkatee fa bunti ndee,

¹⁵ba ma siiwali sa woy yépp, fa buntu Siyoŋ, dëkk bu taaru ba, di bànneexoo sa wall gii!

¹⁶Xeet yee tàbbi pax ma ñu gasoon, fakktaloo fiir ga ñu làqoon.

¹⁷Aji Sax jaa ngi feeñoo, di àtte yoon; ku bon teg ug fiir, tàbbi ca. Na jib ndànk. Selaw.

¹⁸Ñu bon ñee dëddu, dem njaniiw, ànd ak xeet yi fàtte Yàlla yépp.

¹⁹Yàlla du tanqamlu ab ndóol ba fàww, yaakaaru néew-ji-doole du tas mukk.

²⁰Aji Sax ji, jógal, bu la nit yab; na xeet yi dikk fi sa kanam, nga àtte leen.