Sabóor 92:1-15

¹Muy woyu Sabóor ngir bésub Noflaay.

²Céy ngëneel li ci sant Aji Sax ji, di la woy, yaw Aji Kawe ji,

³xëye tudd sa ngor, gonloo xamle sa worma,

⁴xalamu fukki buum ànd ak moroom ma, xeetu kooraa jibandoo.

⁵Aji Sax ji, yaa ma bégale say jaloore, may sarxolle ci say manoore.

⁶Aji Sax ji, yaa réyi jëf; xóoti pexe.

⁷Ku ñàkk xel réere ko, ku dofe umple ko.

⁸Bu ku bon sëqlee nim ñax, képp kuy def lu bon di yokkule, dañoo nara sànku ba fàww rekk.

⁹Waaye yaw ma fa kaw, yaay Aji Sax ji ba fàww.

¹⁰Aji Sax ji, sa noon yi kay, ndeke yoo; ndeke yoo sa noon yi, sànku rekk; defkati mbon ñépp, fëlxoo rekk.

¹¹May nga ma dooley nagu àll, ma diwoo diw gu bees.

¹²Maa gis jéllu noon yi, dégg yuuxi ñu bon ñi may tëru.

¹³Ku jub day naat nig tàndarma, màgg ni seedaru Libaŋ

¹⁴gu ñu jëmbat biir kër Aji Sax ji, muy naate sunu biir ëttu Yàlla;

¹⁵bu màggatee sax di meññ, tooy xepp, sëq lipp,