Sabóor 50:1-23

¹Muy kàddug Sabóor, giiroo ci Asaf. Yàlla, Aji Sax ji Yàlla àddu na, di woo àddina, penku ba sowu.

²Ca Siyoŋ, dëkk ba ca taar ba la Yàlla feeñe ni leer gu jolli.

³Sunu Yàllaa ngi ñëw te du ne cell, sawaraa ko jiitu, di xoyome, ngëlén lu mag wër ko.

⁴Ma ngay woo seede asamaan ak suuf, ngir àtte ñoñam.

⁵Mu ne: «Dajaleel ma sama wóllëre ñiy sarxal, di ko fase sama kóllëreek ñoom.»

⁶Asamaan a ngi biral njekkam, ngir Yàllaay àtte. Selaw.

⁷«Yeen sama ñoñ, dégluleen, ma wax leen; yeen waa Israyil, ma sikk leen. Maa di Yàlla, seen Yàlla.

⁸Du seeni sarax laa leen di sikke, mbaa seen saraxi rendi-dóomal yi sax fi sama kanam.

⁹Soxlawuma yëkku yar ak sikketu gétt.

¹⁰Maay boroom raboo rabu àll, ak junniy nag yuy fore tund ya.

¹¹Xam naa njanaawi tund yi, luy ndundatub tool maa ko moom.

¹²Su ma xiifoon, duma leen ko wax, maa moom àddinaak li ci biiram.

¹³Damay lekk yàppu nag ak a naan deretu sikket a?

¹⁴Deel jaajëfal Yàlla, sarxale ko, di fey Aji Kawe ji loo dige,

¹⁵di ma woo bésub njàqare, ma wallu la, nga màggal ma.»

¹⁶Ñu bon ñi Yàlla ne leen: «Lu ngeen di tari sama dogali yoon, di waxe sama kóllëre?

¹⁷Yeena ngii, bañ sama yar, xalab samay kàddu.

¹⁸Fu ngeen gis ub sàcc, neexook moom, ab njaalookat, ngeen lëngool.

¹⁹Dangeena afal seen gémmiñ ci mbon, seen làmmiñ taqoo fen,

²⁰ngeen di tooge seen mbokk, di yàq deru doomu ndey.

²¹Lii yeena ko def! Damay noppi, ngeen defe ne damaa mel ni yeen? Dama leen di sikk, tuumaal leen, ngeen gis!

²²«Yeen fàttekati Yàlla yi, déggleen lii, bala maa fàdd te kenn du wallu.

²³Ki may sarxale jaajëf moo ma teral; ku topp yoon, ma won ko wallu Yàlla.»