Sabóor 17:1-15

¹Muy ñaanu Daawuda. Éy Aji Sax ji, déglul liy dëgg, déglul, ma woote! Teewlul, ma dagaane la làmmiñ wu mucc fen.

²Yal na sama àtte bawoo fi yaw, nga gis sama njubte.

³Natt nga saab xol, niir ma guddi, settantal ma, gisoo dara. Dogu naa ne duma moye wax.

⁴Su may jëf it, di sàmm sa kàddu. Maay moyu yoonu ku bon.

⁵Sa tànk, sama tànk, jàdduma fenn.

⁶Éy Yàlla, maa lay woo, nga di ma wuyu; teewlu ma te déglu ma!

⁷Na sa ngor feeñ, yaw miy walloo sa doole ku la làqooy noonam.

⁸Sàmm ma ni peru bët; làqe ma sa ker,

⁹ma rëcc ñu bon ñi ma song, noon ñii ma gaw, nar maa bóom.

¹⁰Seen xol dàq yërmande, seeni wax di reewande.

¹¹Tanc nañu nu fépp, ne nu jàkk, nar noo tëral.

¹²Mbete gaynde gu namma fàdde, gaynde gu mat guy tëroo!

¹³Éy Aji Sax ji, jógal dajeek moom, detteel ko. Xettlee ma sa saamar, ma rëcc ku bon.

¹⁴Éy Aji Sax ji, walloo ma sa doole, ma rëcc ñi séddoo dundu àddina. Say soppe, nga reggal, seeni doom regg, desalal seeni doom.

¹⁵Man nag ma am dëgg, ne la jàkk, yewwu, regge sa jëmm.