Sabóor 145:3-20

³Aji Sax jee màgg te jara màggala màggal, kii màggam amul kemu!

⁴Na maasoo maas di màggal say jaloore, di biral sa njàmbaarte.

⁵Sa leeru teddnga ji ne ràññ, ak sa jëf ju yéeme laay jàngat!

⁶Sa dooley jëf ju raglu dees na ko jottli, te sa màggaay maa koy yéene.

⁷Sa mbaax gu réy, dees na ko tari, te sag njekk, dees na ko woy.

⁸Yiw ak yërmande, Aji Sax ji; kee muñ mer te bare ngor!

⁹Aji Sax jee baaxe ñépp, di yërëm lu mu sàkk.

¹⁰Aji Sax ji, lépp loo sàkk a lay gërëm, sa wóllëre yi di la sant,

¹¹di tudd sa teddngay nguur, tey dégtale sag njàmbaar,

¹²doom aadama xam say jaloore ak sa teddngaak sa darajay nguur.

¹³Sa nguur ay nguur gu sax dàkk, sa kilifteef ñeel maasoo maas. Aji Sax ji daa sàmm ay waxam, gore ciy jëfam.

¹⁴Ku daanu, Aji Sax ji wallu; ku sëgg, mu siggil.

¹⁵Ñépp a la wékk bët, di yaakaar, te bu jotee, yaa leen di leel,

¹⁶tàllal sa loxo, reggal luy dund, ba xolam sedd.

¹⁷Aji Sax ji, jëfinam jépp njekk la, jëfam jépp ngor la.

¹⁸Aji Sax ji, képp ku ko woo wall, mu jege la, képp ku ko woo wall te muy dëgg.

¹⁹Nammeelu ku ko ragal, mu sottal; yuuxam, mu dégg, musal.

²⁰Aji Sax jeey sàmm kuy soppeem, di sànk képp ku bon.