SAAMUNƆ 89:9-52 - Luda yã takada kↄ̃n Bokobaru yão

SAAMUNƆ 89:9-52

Click on verse(s) to share them!

⁹Nɛɛ̀ gbãaa mↄ ísiaanɛ, tó à sↄ̃ fɛ̀ɛ vĩvĩnao, nɛɛ̀ à gbãaa fↄ̃.

¹⁰N Igipitinↄ dúgu zↄ̃̀, aↄ̃ gↄ̃̀ gɛ̀nↄ ũ, n n zangurinↄ fã̀akↄ̃a kↄ̃n n gã̀sã gbãaao.

¹¹Musu nɛ́ n pↄ́mɛ, tↄↄtɛ dↄ nɛ́ n pↄ́mɛ, n anduna kàɛ kↄ̃n pↄ́ kɛ̀ kú à guunↄ píngi.

¹²N gu'igbãro kↄ̃n sↄↄmɛtɛo kɛ̀, Tabo kↄ̃n Ɛmↄni gbɛ̀nↄ è guda kɛ kↄ̃n n tↄ́o.

¹³N gã̀sã nɛ́ gbãaa pↄ́mɛ, n ↄ gbãaa bensↄ̃ n ↄplaa dↄ musu.

¹⁴Maakɛ kↄ̃n yãzɛdekɛɛon n kpata kãsãa ũ, gbɛ̃kɛ kↄ̃n náanɛo bé à dↄnnɛ aɛ.

¹⁵Aubarikadeenↄn gbɛ̃ kɛ̀ aↄ̃ↄ gudadↄmmaanↄ ũ, kɛ̀ aↄ̃è táa o gupuraa kɛ̀ kú n kuunzi, Dii.

¹⁶Aↄ̃ègↄ̃ pↄnnaa kɛɛ kↄ̃n n tↄ́o gurↄ píngi, aↄ̃è ĩa dã kↄ̃n n maakɛɛo.

¹⁷Zaakɛ aↄ̃ gakui kↄ̃n ń gbãaaon n ũ, n zɛnawao è wa sɛ́ lezĩ.

¹⁸Wa kína nɛ́ Dii pↄ́mɛ, wa sɛngbango pì nɛ́ Isarailinↄ Luda pↄ́mɛ.

¹⁹N yã ò n yãmarinↄnɛ yã wɛ́ɛgupu'ena guu n bè: Ma dↄnlɛ kɛ̀ gↄ̃ gbãaanɛ, ma gↄ̃kparɛ sɛ̀ musu a gbɛ̃nↄ tɛ́.

²⁰Ma a zↄ̀bleri Dauda è, ma a nↄ́si kùa ma à dìɛ.

²¹Mɛ́gↄ̃ à kũna ma ↄzĩ, ma gã̀sã gbãaa égↄ̃ kúo.

²²Ibɛɛ ke é fↄ̃ à tángba síaro, gbɛ̃ zaa ke é e à ↄ tↄ̃aro.

²³Mɛ́ à wɛdɛrinↄ ú lↄ́ à aɛ, mɛ́ à zangurinↄ nɛ.

²⁴Mɛ́ gbɛ̃kɛɛ kɛɛnɛ kↄ̃n náanɛo, weé à sɛ́ lezĩ kↄ̃n ma tↄ́o.

²⁵Mɛ́ ísiaa nanɛ a ↄzĩ, eégↄ̃ iko vĩ swaanↄa.

²⁶Eé ma sísi à be, má dɛ a De ũ kↄ̃n a Ludao, a gbɛ̀si ũ kↄ̃n a mìsirio.

²⁷Mɛ́ à kɛ ma daudu ũ, eégↄ̃ dɛ anduna kínanↄ mìdee ũ.

²⁸Mɛ́gↄ̃ gbɛ̃kɛɛ vĩo gurↄ píngi, ma bà kɛ̀ kúo gborona vĩro.

²⁹Mɛ́ tó à borii gↄ̃ kí blee gurↄ píngi, à kpata égↄ̃ kuu lán ludambɛɛ ègↄ̃ kuu nà.

³⁰Tó à boriinↄ pã kpà ma dokazi, bensↄ̃ aↄ̃ↄe tɛ́ ma yãdiɛnanↄziro,

³¹tó aↄ̃ bↄ̀ ma yã kpɛɛ, bensↄ̃ aↄ̃ ma yãdannɛnanↄ kũnaro,

³²mɛ́ gò tↄ̃ḿma ń taarinↄ yãnzi, mɛ́ ń kɛ búgubugu ń zaakɛna musu.

³³Mↄde gbɛ̃kɛɛ kɛ̀ má vĩo é yãaro, mɛ́ fↄ̃ mà náanɛsaiyã kɛro.

³⁴Mɛ́ ma bà kuunao yã gbororo, mɛ́ yã kɛ̀ bↄ̀ ma lɛ́n liɛro.

³⁵Má sì kↄ̃n ma kuunao gɛ̃̀n do, mɛ́ ɛgɛɛ to Daudanɛro, kɛ̀ ma bè,

³⁶à borii égↄ̃ kuu gurↄ píngi, à kpata égↄ̃ kuu ma wáa lán ↄfãntɛ̃ bà.

³⁷Lán mↄvura dɛ sèeda náanɛdee ũ musu nà, lɛn à kpata égↄ̃ kuu gurↄ píngi lɛ.

³⁸Baa kↄ̃n beeeo n gi kína kɛ̀ ń kàzi, n ↄ gbàrɛzi n pↄ fɛ̃̀zi maamaa.

³⁹N n bà kuuna kↄ̃n n zↄ̀blerio yã gbòro, n kya kà à kífuran ń pã̀ɛ tↄↄtɛ.

⁴⁰N à wɛ́tɛ bĩinↄ gbòro, n à zɛki gbãaanↄ gbɛ̃̀ ń dàɛ.

⁴¹Gbɛ̃ kɛ̀ aↄ̃ↄe gɛ̃ɛ zɛ́laanↄ ń baka bↄ̀n ń píngi, à gↄ̃̀ fabona pↄ́ ũ a bori daanↄnɛ.

⁴²N à wɛdɛrinↄ gã̀ dↄ̀ musu, ń tò à ibɛɛnↄ pↄnnaa kɛ̀.

⁴³N à fɛ̃ɛda gbãaa ɛ̀, nɛ́ɛ zɛo zĩ̀ guuro.

⁴⁴N à kíkɛgo sìa, n à kíkpata lɛ́ kùɛ.

⁴⁵Ń tò à zi kũ̀ a gbãaan, n wí dàa gumusu ũ.

⁴⁶Dii, nɛ́gↄ̃ utɛnawe ai bↄrɛmɛ? N pↄfɛ̃ tɛ́ égↄ̃ kũu gurↄ píngin yↄ́?

⁴⁷Ǹ laasuu lɛ́ ma wɛ̃̀ndi kusukɛɛa. N gbɛ̃ntee kɛ̀ pãn yↄ́?

⁴⁸Dé bé eégↄ̃ kuu à gí gazii? Dé bé eé fↄ̃ à a zĩnda sí mira gbãaaa?

⁴⁹Dii, gbɛ̃kɛɛ kɛ̀ ń vĩ yãa gàa mámɛ? N yenzi kɛ̀ ń à lɛ́ gbɛ̃̀ Daudanɛ kↄ̃n náanɛo sↄ̃ nɛ́?

⁵⁰Ǹ tó n zↄ̀bleri fabona yã dↄngu, boriinↄ ma atafii kɛ̀ wà ma nↄ̀sɛ yàka.

⁵¹N ibɛɛnↄ kína kɛ̀ ń kà lalandi kɛ̀ ai guu kɛ̀ à kɛ̀sɛ pɛ̀ɛn, Dii.

⁵²Aubarikadeen Dii ũ ai gurↄ píngi! Aami! Aami!