SAAMUNƆ 89:9-26

⁹Nɛɛ̀ gbãaa mↄ ísiaanɛ, tó à sↄ̃ fɛ̀ɛ vĩvĩnao, nɛɛ̀ à gbãaa fↄ̃.

¹⁰N Igipitinↄ dúgu zↄ̃̀, aↄ̃ gↄ̃̀ gɛ̀nↄ ũ, n n zangurinↄ fã̀akↄ̃a kↄ̃n n gã̀sã gbãaao.

¹¹Musu nɛ́ n pↄ́mɛ, tↄↄtɛ dↄ nɛ́ n pↄ́mɛ, n anduna kàɛ kↄ̃n pↄ́ kɛ̀ kú à guunↄ píngi.

¹²N gu'igbãro kↄ̃n sↄↄmɛtɛo kɛ̀, Tabo kↄ̃n Ɛmↄni gbɛ̀nↄ è guda kɛ kↄ̃n n tↄ́o.

¹³N gã̀sã nɛ́ gbãaa pↄ́mɛ, n ↄ gbãaa bensↄ̃ n ↄplaa dↄ musu.

¹⁴Maakɛ kↄ̃n yãzɛdekɛɛon n kpata kãsãa ũ, gbɛ̃kɛ kↄ̃n náanɛo bé à dↄnnɛ aɛ.

¹⁵Aubarikadeenↄn gbɛ̃ kɛ̀ aↄ̃ↄ gudadↄmmaanↄ ũ, kɛ̀ aↄ̃è táa o gupuraa kɛ̀ kú n kuunzi, Dii.

¹⁶Aↄ̃ègↄ̃ pↄnnaa kɛɛ kↄ̃n n tↄ́o gurↄ píngi, aↄ̃è ĩa dã kↄ̃n n maakɛɛo.

¹⁷Zaakɛ aↄ̃ gakui kↄ̃n ń gbãaaon n ũ, n zɛnawao è wa sɛ́ lezĩ.

¹⁸Wa kína nɛ́ Dii pↄ́mɛ, wa sɛngbango pì nɛ́ Isarailinↄ Luda pↄ́mɛ.

¹⁹N yã ò n yãmarinↄnɛ yã wɛ́ɛgupu'ena guu n bè: Ma dↄnlɛ kɛ̀ gↄ̃ gbãaanɛ, ma gↄ̃kparɛ sɛ̀ musu a gbɛ̃nↄ tɛ́.

²⁰Ma a zↄ̀bleri Dauda è, ma a nↄ́si kùa ma à dìɛ.

²¹Mɛ́gↄ̃ à kũna ma ↄzĩ, ma gã̀sã gbãaa égↄ̃ kúo.

²²Ibɛɛ ke é fↄ̃ à tángba síaro, gbɛ̃ zaa ke é e à ↄ tↄ̃aro.

²³Mɛ́ à wɛdɛrinↄ ú lↄ́ à aɛ, mɛ́ à zangurinↄ nɛ.

²⁴Mɛ́ gbɛ̃kɛɛ kɛɛnɛ kↄ̃n náanɛo, weé à sɛ́ lezĩ kↄ̃n ma tↄ́o.

²⁵Mɛ́ ísiaa nanɛ a ↄzĩ, eégↄ̃ iko vĩ swaanↄa.

²⁶Eé ma sísi à be, má dɛ a De ũ kↄ̃n a Ludao, a gbɛ̀si ũ kↄ̃n a mìsirio.