SAAMUNƆ 7:1-17

¹Lɛ̀ kɛ̀ Dauda sì Diinɛ Bɛyãmi bori Kusu yã musu. Dii ma Luda, ma nanzi, ǹ ma mì sí ǹ ma faaba kɛ gbɛ̃ kɛ̀ aↄ̃ pɛ̀ɛmaanↄ ↄzĩ.

²Tó lɛnlo, aↄ̃é ma kɛ gyáigyai lán músu è kɛńnɛ nàmɛ, aↄ̃é ma kɛ̃kɛ̃kↄ̃rɛ, gbɛ̃ke é ma mì síro.

³Dii ma Luda, tó ma taari ke kɛ̀, tó ma ↄↄ kú yã zaaan,

⁴tó ma à zaaa kɛ̀ ma gbɛ̃daaanɛ, ke tó ma gbãaa mↄ̀ ma ibɛɛnɛ pã,

⁵ǹ tó ma ibɛɛ pì pɛ́ɛma à ma kũ, à kɛ̀sɛ pɛ́ɛpɛɛma tↄↄtɛ, à ma vĩi bùsu'ãatɛ̃n.

⁶Ǹ fɛɛ ǹ zɛ kↄ̃n pↄfɛ̃o, Dii, ǹ fɛɛ ma ibɛɛnↄzi ń nↄ̀sɛ kpã̀kpã yãnzi. Ǹ vú, ma Luda, ǹ yã gↄ̃gↄ̃ a zɛ́a.

⁷Ǹ tó gbɛ̃nↄ kakↄ̃anzi, ǹ kí bleńnɛ zaa musu.

⁸Dii, nɛɛ̀ yãkpaɛ kɛ kↄ̃n gbɛ̃nↄ. Dii, ǹ tó yã bↄmao nna ma yãzɛde lɛ́n, Luda Musude, ǹ yã kɛmɛ ma nↄ̀sɛpura lɛ́n.

⁹Luda, ḿbe ń maa, nɛɛ̀ nↄ̀sɛ kↄ̃n laasuuo kpokɛ. Ǹ gbɛ̃ zaaanↄ pãsĩkɛna mì dɛ, ǹ gbɛ̃ maaanↄ gba zɛkii.

¹⁰Luda Musuden ma sɛngbango ũ, è gbɛ̃ kɛ̀ aↄ̃ nↄ̀sɛ maaanↄ mì sí.

¹¹Luda è yãkpaɛ kɛ a zɛ́a, è tó yã gↄ̃ vɛ̃ɛḿma gurↄ píngi.

¹²Tó gbɛ̃ e a nↄ̀sɛ liɛro, Luda è a fɛ̃ɛda lɛ́ kɛ è a sá kú à kã.

¹³È a gↄ̃kɛbↄ kɛ̀ è gaa ińnɛnↄ kɛkɛ, è a kà tɛ́deenↄ kpá sála.

¹⁴Ǹ gwa, yã zaaa è nↄ̀ dↄ gbɛ̃n, ben è wahaa nↄ̀ sí à nɛ́ i ɛgɛɛ ũ.

¹⁵È wɛ̀ɛ yↄ̃ gbɛ̃nↄnɛ zã̀azã takutɛɛ ũ, ben è zu wɛ̀ɛ kɛ̀ à yↄ̃̀ pì guu.

¹⁶À àisi pãsĩ è wí à musu, à wɛ́ɛtãna gbɛ̃nↄa è wí à mìa.

¹⁷Mɛ́ Dii sáabu kpá a maakɛɛ yãnzi, mɛ́ Dii Musude tↄ́ bↄ kↄ̃n lɛ̀sinao.