SAAMUNƆ 69:15-28

¹⁵Ǹton tó ísↄ̃ ma blero, ǹton tó mà kpáɛ í lↄ̀nlo, ǹton tó wɛ̀ɛ tatamalɛro.

¹⁶Ǹ wemala Dii, zaakɛ n gbɛ̃kɛɛ maa, ǹ aɛ dↄma n sùu bíta guu.

¹⁷Ǹton mìkpɛɛ zu n zↄ̀blerinɛro, ǹ wemala kpakpaa, zaakɛ ma gↄ̃ kagurakɛna.

¹⁸Ǹ sↄ̃mazi ǹ ma mì sí, ǹ ma faaba kɛ ma ibɛɛnↄ yãnzi.

¹⁹Ń ma sↄ̃sↄ̃na dↄ̃ kↄ̃n ma wídammao kↄ̃n ma kpɛbↄnao, nɛ́ɛ gbɛ̃ kɛ̀ aↄ̃ↄ ma kũna yãonↄ ee.

²⁰Sↄ̃sↄ̃na ma swɛ̃̀ zↄ̃̀, ma gↄ̃ gbãaa sai, gbɛ̃ kɛ̀ eé ma wɛ̃nda gwaan má wɛ̀tɛ, mɛ́ɛ ero, gbɛ̃ kɛ̀ eé ma nↄ̀sɛ kpáɛmɛɛn ma wɛ́ɛ dↄ̀zi, à kuuro.

²¹Aↄ̃ ɛ̃zɛ̃ zaaa kàmɛ pↄ́bleen, kɛ̀ ímii ma dɛ, aↄ̃ wɛ̃ kpã̀kpãa kpàma ma mi.

²²Aↄ̃ zĩbaakɛna gↄ̃ńnɛ takutɛɛ ũ à ń kũ à yã lúńnɛ.

²³Aↄ̃ wɛ́ɛ sisi lɛ aↄ̃ton guu ero, aↄ̃ wó gↄ̃ kokona.

²⁴Ǹ n pɛ̃tɛ̃ pitaḿma, ǹ n pↄfɛ̃ pãsĩ pisiḿma.

²⁵Aↄ̃ bɛɛ gↄ̃ bɛzĩ ũmɛ, aↄ̃ gbɛ̃ke tóngↄ̃ kuu lɛ à vɛ̃ɛ ń kpɛ́n dↄro.

²⁶Zaakɛ aↄ̃è wɛ́ɛ tã gbɛ̃ kɛ̀ n ń lɛ́nↄa, aↄ̃è gbɛ̃ kɛ̀ n ń kari kɛ̀nↄ wãwã yã o.

²⁷Ǹ ń yã píngi taari dińnɛ, aↄ̃ baka tóngↄ̃ kú n mìsina guuro.

²⁸Ǹ ń tↄ́ gogo wɛ̃̀ndi takada guu, lɛ aↄ̃ tↄ́ tóngↄ̃ kú kↄ̃n gbɛ̃ maaanↄ tↄ́oro.