SAAMUNƆ 68:2-20

²Lán tɛ́sukpɛ è gɛ̃ kↄ̃n ĩao nà, ǹ tó aↄ̃ gɛ̃tɛ lɛ. Lán zↄ́sa è yↄ́ nà tɛ́ saɛ, zaakɛrinↄ é kaatɛ Luda aɛ lɛ.

³Gbɛ̃ maaanↄ sↄ̃ pↄnnaa kɛ, aↄ̃ yáa dↄ Luda aɛ, aↄ̃ vĩvĩ kↄ̃n pↄnna bítao.

⁴À lɛ̀ sí Ludanɛ à lɛ́ maa, à di ludambɛ luguua, à à tↄ́ bↄ, à tↄ́n Dii, à pↄnna wii pɛ́ à aɛ.

⁵Kuuna a kpɛ́ kɛ̀ kú adona guu, Luda nɛ́ tonɛnↄ demɛ, gyaanↄnↄ zɛnyodeemɛ.

⁶Luda è bɛɛ kɛ gbɛ̃ kɛ̀ gbɛ̃ vĩroonɛ, è pisinanↄ bↄɛ à ń da nnamanan, swãgbãadeenↄ sↄ̃ égↄ̃ kú gukori guumɛ.

⁷Luda, kɛ̀ n dↄ n gbɛ̃nↄnɛ aɛ, gurↄↄ kɛ̀ n táa òńyo gbáan,

⁸tↄↄtɛ nìgãnigã, ludambɛɛ lou gbàrɛ n aɛ, mmↄn kɛ̀ n yã ò Sinai kpiii musu aɛ, Luda, Isarailinↄ Luda.

⁹Luda, ń tò mↄdↄ kpà ń bùsua kↄ̃sↄ̃kↄ̃sↄ̃, n n gbɛ̃ kpasananↄ gbà gbãaa.

¹⁰N gbɛ̃nↄ vɛ̃̀ɛ à guu, Luda, ben n wɛ̃ndadeenↄ gbà pↄ́ n maakɛɛ yãnzi.

¹¹Dii yã ò, ben nↄgbɛ̃nↄ gↄ̃̀ à baarukparinↄ ũ pari.

¹²Kínanↄ kↄ̃n ń zĩ̀kpɛɛnↄↄ e bàa lɛɛ kpakpaa, nↄgbɛ̃ kɛ̀ aↄ̃ gↄ̃̀ bɛɛnↄↄ e ń pↄ́nↄ kpaatɛtɛ.

¹³Baa kɛ̀ a daɛ kpàsa gura, kondogi í kú ma pↄ̃tɛ̃ɛ dɛ̀bɛnↄa, à kãnↄↄ e tɛ́ kɛɛ lán vura bà.

¹⁴Kɛ̀ Gbãapingide kínanↄ fã̀akↄ̃a, aↄ̃ kwɛ̀ Zalamↄ kpiiia lán lougbɛ bà.

¹⁵Basã kpiii gakui vĩ, Basã kpii mìsↄ̃ntɛ̃nↄↄ pari.

¹⁶Amↄa kpii mìsↄ̃ntɛ̃nↄ, bↄ́yãnzin ée kpiii kɛ̀ Ludaa sɛ̀ a kíblekii ũu gwaa nↄ̀sɛgↄ̃aanↄozi? Gwen Dii égↄ̃ kún gurↄ píngi.

¹⁷Luda sↄ̃goronↄↄ lɛ́ vĩro, à kà bↄrↄ lɛo ũgbangba. Dii bↄ̀o zaa Sinai, à mↄ̀ à pìta a guu kɛ̀ kú adonan.

¹⁸N fɛɛ n ta musu dↄna zĩ̀zↄnↄnɛ aɛ, n gbaa sì gbɛ̃nↄa ai kↄ̃n swãgbãadeenↄ, ben n vɛ̃ɛ gwe, Dii Luda.

¹⁹Aubarikadeen Dii Luda wa mìsiri ũ, àmbe ègↄ̃ wa asoonↄ sɛna lán guu e dↄↄ nà.

²⁰Wa Luda nɛ́ Luda kɛ̀ è ń mì símɛ, Dii Luda bé è wa bↄ gaa lɛ́zĩ.