SAAMUNƆ 37:6-35 - Luda yã takada kↄ̃n Bokobaru yão

SAAMUNƆ 37:6-35

Click on verse(s) to share them!

⁶Eé tó yã bↄnyo nna lán gudↄna bà, eé tó ǹ bↄ maa lán fãantɛ̃ gupuraa bà.

⁷Ǹ lɛ́ yĩtɛ Dii aɛ ǹ sↄ̃kpazi, ǹton tó auzikide yã n kũ gbãa gurↄↄ kɛ̀ à bↄ̀ kↄ̃n a wɛ́ɛzɛ̃ zaaaoro.

⁸Ǹ pↄfɛ̃ tó ǹ mì kɛ̃ pɛ̃tɛ̃a. Ǹton tó yã beeenↄ n kũ gbãaro, è mↄ́ kↄ̃n yãzaakɛnaomɛ.

⁹Zaakɛ gbɛ̃ zaaanↄ é kaatɛ, gbɛ̃ kɛ̀ aↄ̃ wɛ́ɛ dↄ Diizinↄ bé wégↄ̃ bùsu vĩ.

¹⁰À gↄ̃̀ féte kɛ̀ gbɛ̃ zaaanↄ égↄ̃ kuu dↄro, baa tó n ń wɛ́tɛ, nɛ́ ń ero.

¹¹Zĩndabusarinↄ bé wégↄ̃ bùsu vĩ, aↄ̃égↄ̃ pↄnnaa kɛɛ kↄ̃n aafia bítao.

¹²Gbɛ̃ zaaa è à zaaa kpákpa gbɛ̃ maaazi, è fɛ̃zi.

¹³Mↄde Dii ègↄ̃ à yáa dↄↄ, zaakɛ à dↄ̃ kɛ̀ à gurↄↄ é papa.

¹⁴Gbɛ̃ zaaanↄ è fɛ̃ɛdaa woto, aↄ̃è ń kà kpá sála, lɛ wà e wà takaasideenↄ kↄ̃n wɛ̃ndadeenↄ dɛdɛo, aↄ̃é gbɛ̃ kɛ̀ ń yãkɛna maaanↄ kaatɛ.

¹⁵Aↄ̃ zĩnda fɛ̃ɛdaa é ń zↄ̃ ń swɛ̃̀n, weé ń sánↄ ɛ́'ɛńnɛ.

¹⁶Pↄ́ féte kɛ̀ gbɛ̃ maaa vĩi dɛ gbɛ̃ zaa pariinↄ auzikila,

¹⁷zaakɛ gbɛ̃ zaaanↄ gbãaa é mì dɛ, mↄde Diin gbɛ̃ maaanↄ kũna ũ.

¹⁸Dii taarisaideenↄ yã dↄ̃, aↄ̃ baka ègↄ̃ dɛ ń pↄ́ ũ gurↄ píngi.

¹⁹Wí é ń kũ yã pãsĩ gurↄↄ zĩro, baa tó dekaa kà, aↄ̃égↄ̃ kãna.

²⁰Gbɛ̃ zaaanↄ sↄ̃ é kaatɛ, Dii ibɛɛnↄ é yãa lán sɛ̃̀la bↄ̀rↄ nà, aↄ̃é gɛ̃tɛ lán tɛ́sukpɛ bà.

²¹Gbɛ̃ zaaa è pↄ́ sɛ̃kãḿma à à fĩa boro, gbɛ̃ maaa sↄ̃ è gba da maamaa.

²²Gbɛ̃ kɛ̀ Dii aubarika dàńgunↄ bé wégↄ̃ bùsu vĩ, gbɛ̃ kɛ̀ à lɛ́ kɛ̀ńnɛnↄ sↄ̃ é kaatɛ.

²³Dii è gbɛ̃ da zɛ́ kɛ̀ dɛ à sɛ́a, à pↄↄ ègↄ̃ nna à kuunaa.

²⁴Baa tó à gɛ̃̀n sì, eé lɛ́ɛro, kɛ̀ Dii à kũna yãnzi.

²⁵Zaa ma gↄ̃kparɛkɛgurↄ ai ma gaa ma zi kũ̀o la, mɛ́ɛ e Luda gbɛ̃ maaa zĩ̀nna zikiro, mɛ́ɛ e à nɛ́nↄↄ e baa kɛɛro.

²⁶Ègↄ̃ gba daa gurↄ píngi ègↄ̃ pↄ́ sɛ̃kãańnɛmɛ, à nɛ́nↄ égↄ̃ aubarika vĩ.

²⁷Ǹ kpɛɛ li yã zaaanɛ ǹgↄ̃ à maaa kɛɛ, nɛ́gↄ̃ kú bùsu kɛ̀n gurↄ píngi.

²⁸Zaakɛ Dii ye yãzɛdeezi, eé a náanɛkɛrinↄ zĩnnaro. Aↄ̃égↄ̃ kuu aafia gurↄ píngi, gbɛ̃ zaaanↄ sↄ̃ é kaatɛ.

²⁹Gbɛ̃ maaanↄ bé wégↄ̃ bùsu vĩ, aↄ̃égↄ̃ kún gurↄ píngi.

³⁰Ɔ̃ndↄ̃yã è bↄ gbɛ̃ maa lɛ́n, à lɛ́ è yãzɛdee o.

³¹À Luda doka kú à swɛ̃̀n, à gbá è sata pↄ́kearo.

³²Gbɛ̃ zaaa è gbɛ̃ maaa kpákpa lɛ à e à à dɛ,

³³mↄde Dii é à tó à ↄzĩro, eé we yãkpaɛ à nɛro.

³⁴Ǹ sↄ̃kpa Diizi ǹgↄ̃ à yã kũna, eé n kaara lɛ ǹgↄ̃ bùsu vĩ, nɛ́ gbɛ̃ zaaanↄ kaatɛna e.

³⁵Ma gbɛ̃ zaa gbãade ke è yã, à gbã̀ à ↄ tà lán lí kɛ̀ tↄↄtɛ kɛ̀nɛ nnaa bà.