Sɑ̃ɑrun Woodɑ 7:18-36

¹⁸Goo ù n siɑrɑbun yɑ̃ku yɑɑ ye yɑ tiɑrɑ sere sɔ̃ɔ itɑ temɑ, Gusunɔ kun mɑɑ yɛ̃ron yɑ̃ku te mwɑɑmɔ. U win yɑ̃kuru gɑrisiwɑ mi kɑm domi yɑɑ ye, yɑ disi duurɑ. Wì u mɑɑ ye temɑ, yɛ̃ro u torɑwɑ mi.

¹⁹Mɛyɑ bɑ̀ n mɑɑ kɑ yɑ̃ku yɑɑ gɑ̃ɑnu bɑbɑ ni nu disi mɔ, bɑ koo ye dɔ̃ɔ mɛniwɑ, bɑ ǹ ye dimɔ. Wi u kun disi mɔ, wiyɑ koo yɑ̃ku yɑɑ tem,

²⁰ɑdɑmɑ goo ù n wɑ̃ɑ disi gɛɛ sɔɔ u kɑ siɑrɑbun yɑ̃kuru dimɔ te bɑ Yinni Gusunɔ kuɑ, bɑ koo yɛ̃ro girɑwɑ win tɔmbun suunu sɔɔn di.

²¹Goo ù n mɑɑ tɔnu bɑbɑ wi u disi mɔ, ǹ kun mɛ yɑɑ gɑɑ ye yɑ sɑ̃ɑ seseru, ǹ kun mɛ gɑ̃ɑnu gɑnu ni nu disi mɔ, mɑ u kɑ siɑrɑbun yɑ̃kuru di te bɑ Yinni Gusunɔ kuɑ bɑ koo yɛ̃ro girɑwɑ win tɔmbun suunu sɔɔn di.

²²Yinni Gusunɔ u mɑɑ Mɔwisi sɔ̃ɔwɑ u nɛɛ,

²³ɑ Isirelibɑ sɔ̃ɔwɔ ɑ nɛɛ, bu ku yɑɑ gɑɑn gum di nge yɑ̃ɑru ǹ kun mɛ kɛtɛ, ǹ kun mɛ boo. Bu ku yen gɑɑn gum di.

²⁴Sɑbe te gbeeku yɑɑ yɑ go, ǹ kun mɛ te tɑ gu, i ko i kpĩ i kɑ ten gum gɑ̃ɑnu ko. Adɑmɑ i ǹ mu dimɔ.

²⁵Goo ù n yɑ̃kurun yɑɑn gum di mɛ bɑ kɑ Yinni Gusunɔ yɑ̃ku dɔ̃ɔ mwɑɑrɑrugiru kuɑ, bɑ koo yɛ̃ro girɑwɑ wigibun suunu sɔɔn di.

²⁶I ku gunɔ gɑgun yɛm di ǹ kun mɛ yɑɑ gɑɑ, bɑɑ mi i dɑ kpuro.

²⁷Wi u mu di, bɑ koo yɛ̃ro girɑwɑ win tɔmbun suunu sɔɔn di.

²⁸Yinni Gusunɔ u Mɔwisi sɔ̃ɔwɑ u nɛɛ,

²⁹ɑ Isirelibɑ woodɑ yeni wɛ̃ɛyɔ ɑ nɛɛ, goo ù n nɛ Yinni Gusunɔ siɑrɑbun yɑ̃kuru kuɑmmɛ, u koo wunɑwɑ ye yɑ sɑ̃ɑ nɛgiɑ.

³⁰Win tiiwɑ u koo kɑ nɛ, Yinni Gusunɔ yen gum kɑ yen guro guroru nɑɑwɑ u kpɑrɑ nɛn wuswɑɑɔ.

³¹Yɑ̃ku kowowɑ u koo yen gum mɛ dɔ̃ɔ doke yɑ̃ku yerɔ. Adɑmɑ yɑɑ guro guro te, tɑ ko n sɑ̃ɑwɑ Aroni kɑ win bibugiru.

³²Yɑ̃ku yɑɑ yen nɔmu nɔm geuguu gɑ ko n mɑɑ sɑ̃ɑwɑ Aroni kɑ win bibuguu.

³³Yɑɑ nɔmu ge, gɑ ko n sɑ̃ɑwɑ Aronin biiguu wi u yɛm yɛ̃kɑ mɑ u yɑɑ gum mɛ doke yɑ̃ku yerɔ.

³⁴Yɑɑ nɔmu ge, ge bɑ mɑn sɔ̃ɔsi, kɑ yen guro guro te bɑ kpɑrɑ nɛn wuswɑɑɔ sɑnɑm mɛ bɑ siɑrɑbun yɑ̃kuru mɔ̀ mi, yerɑ yɑ ko n dɑ n sɑ̃ɑ Aroni kɑ win bibugiɑ sere kɑ bɑɑdommɑɔ.

³⁵Yɑ̃ku dɔ̃ɔ mwɑɑrɑruginu sɔɔ, yeniwɑ yɑ ko n sɑ̃ɑ Aroni kɑ win bibugiɑ dɔmɑ tèn di bɑ koo bu gum tɑ̃re bu kɑ ko yɑ̃ku kowobu.

³⁶Woodɑ yerɑ Yinni Gusunɔ u Isirelibɑ wɛ̃ɛmɔ bu kɑ Aroni kɑ win bibu yɑɑ ye wɛ̃ sɑɑ dɔmɑ tèn di bɑ bu gum tɑ̃re bu kɑ ko yɑ̃ku kowobu. Bɑ ko n dɑ bu ye kuewɑ sere kɑ ben bibun bweserɔ.