Sɑ̃ɑrun Woodɑ 24:13-22

¹³Yerɑ Yinni Gusunɔ u Mɔwisi sɔ̃ɔwɑ u nɛɛ,

¹⁴i kɑ durɔ wi yɑrio sɑnsɑnin di. Be bɑ mɑɑ nuɑ u nɛ Yinni Gusunɔ gɑri kɑm gerusi mi, kpɑ bu ben nɔmɑ sɔndi win wirɔ bu kɑ seedɑ di kpɑ Isirelibɑ kpuro bu nùn kpenu kɑsuku bu go.

¹⁵Yen biru woodɑ yeniwɑ kɑɑ Isirelibɑ wɛ̃ ɑ nɛɛ, wi u nɛ, Yinni Gusunɔ gɑri kɑm gerusi, yɛ̃ro u koo yen ɑre wɑ.

¹⁶Wi u gesi nɛ, Yinni Gusunɔ gɑri kɑm gerusi, bɑ koo yɛ̃ro gowɑ. Isirelibɑ kpurowɑ bɑ koo nùn kpenu kɑsuku bu go. Bɑɑ ù n sɑ̃ɑn nɑ sɔɔ, bɑ koo nùn gowɑ yèn sɔ̃ u nɛ, Yinni Gusunɔ gɑri kɑm gerusi.

¹⁷Goo ù n win winsim go, bɑ koo mɑɑ yɛ̃ro gowɑ.

¹⁸Goo ù n win winsim yɑɑ sɑberu go, u koo ten kɔsire wɛ̃wɑ wɑsiru. Hundewɑ yɑ hunden kɔsire.

¹⁹Goo ù n mɑɑ win winsim mɛɛrɑ kuɑ, mɛɛrɑ yen bweserɑ bɑ koo yɛ̃ro ko.

²⁰Wi u goo buɑ, bɑ koo mɑɑ yɛ̃ro buɑwɑ. Wi u goon nɔni wĩɑ, bɑ koo mɑɑ yɛ̃ron nɔni wĩɑwɑ. Wi u goon dondu buɑ, bɑ koo mɑɑ yɛ̃rogiru buɑwɑ. Kɔ̃sɑ ye tɔnu u win tɔnusi kuɑ kpuro, yerɑ bɑ koo mɑɑ nùn kɔsie.

²¹Wi u yɑɑ sɑberu go, u koo ten kɔsire wɛ̃wɑ. Wi u mɑɑ tɔnu go, bɑ koo mɑɑ yɛ̃ro gowɑ.

²²Woodɑ tiɑ yerɑ bɑ koo kɑ bɛɛ kɑ bɛɛn sɔbu siri. Nɛ Gusunɔ bɛɛn Yinniwɑ nɑ ye geruɑ.