Sɑ̃ɑrun Woodɑ 14:16-51

¹⁶Kpɑ u kɑ win nɔm geun niki biɑ gum mɛ dɛkɑ u mu yɛ̃kɑ nɔn nɔɔbɑ yiru Yinni Gusunɔn wuswɑɑɔ.

¹⁷Yen biru, kpɑ u gum mɛ mu tie tɛɛni wi u dɛɛrɑsiɑmɔn soo nɔm geuguuɔ kɑ mɑɑ win nɔm geun niki biɑ bɑkɑɔ kɑ win nɔɔ nɔm geuguun niki biɑ bɑkɑɔ. U koo mu tɛɛniwɑ mi u rɑɑ yɛm mɛ doke.

¹⁸Kpɑ u mɑɑ mɛ mu tie win nɔmɑ sɔɔ doke yɛ̃ron wiru wɔllɔ kpɑ u nùn dɛɛrɑsiɑbun wororu koosi Yinni Gusunɔn wuswɑɑɔ.

¹⁹Kpɑ u nùn torɑrun yɑ̃kuru kuɑ. Nge mɛyɑ u koo kɑ nùn dɛɛrɑsiɑ. Yen biruwɑ u koo yɑ̃ku dɔ̃ɔ mwɑɑrɑrugirun yɑɑ go.

²⁰Kpɑ u ye dɔ̃ɔ doke yɑ̃ku yerɔ kɑ kɛ̃nu. Nge mɛyɑ u koo kɑ yɛ̃ro torɑrun yɑ̃kuru kuɑ kpɑ u dɛɛrɑ.

²¹Wi u bɑrɑ disigiru mɔ mɑ u ǹ dɑm mɔ u kɑ yɑ̃ku yɑɑ sɑberu wɑ, yɑ̃ɑ teerɑ u koo kɑsu u kɑ yɑ̃kuru ko te tɑ sɑ̃ɑ torɑrun sɔmbugiru. Yɑ̃ku kowo u koo kɑ tu suuru kɑnɑbun wororu ko Yinni Gusunɔn wuswɑɑɔ. Yen biru durɔ wi, u koo som kilo itɑ wɛ̃ mɛ bɑ burɑ kɑ gum kɑ sere mɑɑ gum litirin bɔnu.

²²U koo mɑɑ kɑ kpɑrukonu yiru nɑ ǹ kun mɛ totobɛrɛnu yiru nge mɛ win wɑɑrɑ nɛ. Bɑ koo gen teu go win torɑrun suurun sɔ̃. Kpɑ bu mɑɑ kɑ teu ge gɑ tie yɑ̃ku dɔ̃ɔ mwɑɑrɑrugiru ko.

²³Win dɛɛrɑsiɑbun sɔ̃ɔ itɑserɑ u koo kɑ ye kpuro yɑ̃ku kowo nɑɑwɑ sɑ̃ɑ yerun kɔnnɔwɔ Yinni Gusunɔn wuswɑɑɔ.

²⁴Yɑ̃ku kowo wi, u koo yɑ̃ɑ te mwɑ kɑ gum litirin bɔnu ye, kpɑ u ye kpuro sɔ̃ɔsi beri berikɑ Yinni Gusunɔn wuswɑɑɔ.

²⁵Yen biru u koo yɑ̃ɑ te sɑkɑ kpɑ u ten yɛm suɑ u tɛɛni wi u rɑɑ bɑrɑ disigiru mɔn soo nɔm geuguuɔ kɑ win nɔm geun niki biɑ bɑkɑɔ kɑ sere mɑɑ win nɔɔ nɔm geuguun niki biɑ bɑkɑɔ.

²⁶Yen biru yɑ̃ku kowo wi, u koo gum mɛ wie win nɔm dwɑrun nɔm wɔɔrɔ.

²⁷Kpɑ u kɑ win nɔm geun niki biɑ gum mɛ dɛkɑ u yɛ̃kɑ nɔn nɔɔbɑ yiru Yinni Gusunɔn wuswɑɑɔ.

²⁸U koo mɑɑ gum mɛ tɛɛni wi u rɑɑ bɑrɑ disigiru mɔn soo nɔm geuguuɔ kɑ nɔm geun niki biɑ bɑkɑɔ kɑ sere win nɔɔ nɔm geuguun niki biɑ bɑkɑɔ. U koo mu dokewɑ mi u rɑɑ gesi yɛm tɛɛni.

²⁹Yen biru gum mɛ mu tie win nɔmɑɔ, u koo mu wisiwɑ wi u rɑɑ bɑrɑ disigiru mɔn wirɔ u sere nùn dɛɛrɑsiɑbun wororu kuɑ Yinni Gusunɔn wuswɑɑɔ.

³⁰Yen biru, u koo gunɔ gen teu go, gèn bweseru u wɑ.

³¹Bɑ koo kɑ gen teu torɑrun suurun yɑ̃kuru ko. Teu mɑɑ yɑ̃ku dɔ̃ɔ mwɑɑrɑrugiru kɑ som mɛ, kɑ gum mɛ. Kpɑ yɑ̃ku kowo wi, u wi u rɑɑ bɑrɑ disigiru mɔ dɛɛrɑsiɑbun wororu kuɑ Yinni Gusunɔn wuswɑɑɔ.

³²Woodɑ yeniwɑ wi u bɑrɑ disigiru mɔ mɑ u ǹ dɑm mɔ u koo swĩi u kɑ dɛɛrɑsiɑbun yɑ̃kuru ko.

³³Yinni Gusunɔ u Mɔwisi kɑ Aroni sɔ̃ɔwɑ u nɛɛ,

³⁴sɑnɑm mɛ i ko i du Kɑnɑnin temɔ mɛ kon bɛɛ wɛ̃, nɑ̀ n derɑ disi gɔmi yi kpiɑ diru gɑru sɔɔ tè sɔɔ i wɑ̃ɑ,

³⁵wi u dii te mɔ, u koo dɑwɑ u yɑ̃ku kowo sɔ̃ u nɛɛ, wee u gɑ̃ɑnu wɑɑmɔ win dirɔ nge disi gɔmi.

³⁶Yɑ̃ku kowo wi, u sere du u kɑ dii te mɛɛri, u koo dewɑ bu ten yɑ̃nu kpuro yɑrɑ kpɑ yɑ̃ɑ nin tii nu ku rɑɑ disi duurɑ. Yen biru u koo du kpɑ u disi gɔmi yi mɛɛri.

³⁷Ù n deemɑ gɔmi yi sɑ̃ɑ nge wuru bekusu, ǹ kun mɛ yi sɔ̃ri, kpɑ yi n sɑ̃ɑ nge wɔru gɑnɑ ye sɔɔ,

³⁸u koo yɑriwɑ kpɑ u dii te kɛnɛ sɔ̃ɔ nɔɔbɑ yiru.

³⁹Sɔ̃ɔ nɔɔbɑ yiruse, yɑ̃ku kowo u koo wurɑ diru mi. Ù n deemɑ disi gɔmi yi yɑbi dii ten gɑni sɔɔ,

⁴⁰u koo de bu dii ten kpenu wɔɔriwɑ nìn mi disi gɔmi yi, yi kpiɑ bu kɑ nu yɑri wuun di bu kɔ̃ mi n kun dɛɛre.

⁴¹U koo dewɑ bu dii ten sɔɔwɔ kpuro kɛrɑ kpɑ bu yɑnim mɛ bɑ kɛrɑ mi yɑri wuun biruɔ mi n kun dɛɛre.

⁴²Yen biru kpɑ bu kpee kpɑɑnu kɔsire ko. Kpɑ bu wure bu dii te tɑ̃wɑ.

⁴³Amɛn biru, disi gɔmi yi, yì n mɑɑ wurɑmɑ dii te sɔɔ,

⁴⁴yɑ̃ku kowo u koo mɑɑ sewɑ u dɑ u tu mɛɛri. Ù n deemɑ disi gɔmi yi, yi mɑɑ kpiɑ dii ten gɑni sɔɔ, sɑɑ ye sɔɔ, n ǹ mɑɑ koorɔ bu yi wĩɑ min di. Dii te, tɑ disi duurɑwɑ mi.

⁴⁵Bɑ koo tu surɑwɑ kpɑ bu ten kpenu kɑ dɑ̃ɑ kɑ tem gurɑ bu kɑ dɑ wuun biruɔ mi n kun dɛɛre.

⁴⁶Wi u duɑ diru mi sɑnɑm mɛ bɑ tu kɛnusi, u disi duurɑwɑ mi sere kɑ yokɑɔ.

⁴⁷Wi u kpunɑ mi, ǹ kun mɛ u gɑ̃ɑnu di mi, u koo win yɑ̃nu teɑwɑ.

⁴⁸Sɑnɑm mɛ bɑ dii te sɔnwɑ bɑ kpɑ, yɑ̃ku kowo ù n wurɑ u kɑ tu mɛɛri, mɑ u deemɑ disi gɔmi yi sɑri, u koo dii te gɑrisiwɑ tɑ dɛɛre. Domi disi gɔmi yi, yi doonɑ.

⁴⁹Bu kɑ dii ten dɛɛrɑsiɑbun woronu ko, bɑ koo gunɔsu yiru kɑsuwɑ kɑ dɑ̃ɑ ye bɑ mɔ̀ sɛduru kɑ kiku ge bɑ mɔ̀ isɔpu kɑ wɛ̃ɛ wunɔmgii.

⁵⁰U koo gunɔ gen teu sɑkɑwɑ wekeru sɔɔ te bɑ kuɑ kɑ sɔndu tɑ nim gem mɔ.

⁵¹Yen biru, u koo ge gɑ wɑsi suɑ kɑ sɛduru ye, kɑ isɔpu ye, kɑ wɛ̃ɛ wunɔmgii yi, kpɑ u ye kpuro doke gunɔ ge bɑ sɑkɑn yɛm mɛ sɔɔ, mɛ bɑ wisi nim sɔɔ mi, kpɑ u mu yɛ̃kɑ nɔn nɔɔbɑ yiru dii te sɔɔ.