Süleymanin Məsəlləri 6:8-27

⁸Yayda azuqələrini yığar, Biçin vaxtı özlərinə yem toplayarlar.

⁹Ey tənbəl, nə qədər yatacaqsan? Nə vaxt yuxudan oyanacaqsan?

¹⁰Bir az da uzanıb yuxuya dalsan, Əl-qolunu uzadaraq yatsan,

¹¹Yoxsulluq soyğunçu kimi üstünə gələr, Ehtiyac quldur kimi sənə hücum çəkər.

¹²Yaramaz adam – şər insan Əyri danışaraq dolanar,

¹³Göz vurar, ayaqları ilə işarə edər, Barmaqları ilə göstərər.

¹⁴Qəlbinin məkrli niyyəti var, Həmişə şər qurar, nifaq salar.

¹⁵Ona görə başına qəfildən bəla gələr, Birdən yıxılıb çarəsiz qalar.

¹⁶Rəbbin zəhləsi altı şeydən gedir, Yeddi şey var, ondan ikrah edir:

¹⁷Təkəbbürlə baxan gözlər; Yalan danışan dil; Nahaq qan tökən əllər;

¹⁸Məqsədi şər olan ürək; Şərə çatmaq üçün qaçan ayaqlar;

¹⁹Nəfəsini yalanla çıxaran yalançı şahid; Qardaşlar arasında nifaq salan şəxs.

²⁰Oğlum, atanın əmrini yerinə yetir, Ananın öyrətdiklərini atma.

²¹Onları qəlbinin başına yapışdır, Həmişə onları boynuna bağla.

²²Gəzəndə onlar sənə yol göstərər, Yatanda səni hifz edər, Oyananda sənə məsləhət verər.

²³Bu əmr çıraqdır, bu təlim nurdur, Tərbiyə üçün edilən məzəmmət həyat yoludur.

²⁴Bunlar səni pozğun qadından, Şirindilli yad arvaddan qoruyar.

²⁵Onun gözəlliyinə aşiq olma, Onun kirpiklərinin əsiri olma.

²⁶Fahişənin üzündən insan bir tikə çörəyə möhtac qalar, Kiminsə zinakar arvadı insanın qiymətli canını ovlar.

²⁷Bir kişi qoynuna od alanda Əyin-başı yanmazmı?