Süleymanin Məsəlləri 25:5-15

⁵Əgər şər adam padşahın yanından ayrılarsa, Taxtı salehliklə möhkəmlənər.

⁶Padşahın hüzurunda özünü ucaltma, Rütbəlilərin yanında dayanma.

⁷Çünki «buyur yuxarı» dəvətini almaq Bir əsilzadə qarşısında aşağı endirilməkdən yaxşıdır.

⁸Gördüyün şeylər barədə Dava yaratmağa tələsmə. Sonra qonşun səni utandırsa, nə edərsən?

⁹Münaqişəni qonşunla özün həll et, Özgənin sirrini açma.

¹⁰Yoxsa hər eşidən sənə xor baxar, Bu səni etibardan salar.

¹¹Yerində deyilən sözlər, Gümüş oymalar içində qızıl almalara bənzər.

¹²Sözəbaxan insana hikmətlinin məzəmməti Qızıl sırğa, qızıl bəzək kimidir.

¹³Biçin zamanı qar kimi sərinlik necədirsə, Etibarlı elçi də onu göndərən üçün belədir. O, ağasının ruhunu təzələyir.

¹⁴Kim ki vermədiyi bəxşişlərlə öyünür, Yağışsız buluda və küləyə bənzəyir.

¹⁵Səbirlə hökmdarı da inandırmaq olar, Şirin dil sümükləri belə, yumşaldar.