Süleymanin Məsəlləri 24:11-24

¹¹Ölümə aparılanları qurtar, Qırğın təhlükəsi altında olanları geri çək.

¹²Desən ki, bax bundan xəbərim yox idi, Ürəkləri yoxlayan bunu görməzmi? Canını qoruyan bunu bilməzmi? İnsan əməlinə görə Ondan əvəz almazmı?

¹³Oğlum, bal ye, xeyri var, Şanı balının şirin dadı damağında qalar.

¹⁴Bil ki, hikmət də canın üçün belə olar, Onu tapsan, nəticəsi də var, Ümidin boşa çıxmaz.

¹⁵Ey şər insan, salehin yurdu üçün pusqu qurma, Onun evini soyma.

¹⁶Saleh yeddi dəfə yıxılsa belə, yenə qalxar, Şər insan büdrəsə, bəlaya düçar olar.

¹⁷Düşməninin yıxılmasına sevinmə, Onun büdrəməsinə görə ürəyin fərəhlənməsin.

¹⁸Yoxsa Rəbb görər, bundan xoşu gəlməz, Düşmənin üzərindən qəzəbini götürər.

¹⁹Pislik edənlərə görə qəzəblənmə, Şər insanlara qibtə etmə,

²⁰Çünki pis insanın axırı yoxdur, Şər adamın çırağı sönər.

²¹Oğlum, Rəbdən və padşahdan qorx, Xəyanətkarlarla yoldaş olmaqdan çəkin.

²²Onların bəlası qəfildən gəlir. Hər ikisinin verəcəyi cəzanı kim bilir?

²³Bu sözləri də hikmətlilər deyib: Məhkəmədə tərəfkeşlik etmək yaxşı deyil.

²⁴Pis insana «sən salehsən» deyəni xalqlar qınayar, Ümmətlər lənət yağdırar.