RUUMIYA 6:1-11

¹Dhali gwo gi wakata imina ana i/o mo sa/? Mina ana rash ’ko e miinthus ki sule/ mo ’taa? jin min ma ’the i/ish mowa?

²Dhalku/ ki ṯosh kan. Ana gun wukina mo e miinthus mo tani ana mina ’ko ki e e a’di mmana?

³Ki ’kona um ki misha ki ana ’baar gun cuc̱kunu eya Ḵrisṯẖos jin ta’da Yesus mo ’kokunu mo mmocuc̱ mo nyaḵki jwam piti mo ’taa?

⁴Ana ’kokunu mo mmokan mo kan nyaḵki a’di mo e jwam piti mo. Dhali wakan si’da/ me’da Ḵrisṯẖos mmocukunu a’di mis mo ’peni mowu ki monyca ma Baba mo tani ana si’da/ mina nyaḵ mondiki/en this yan mo be.

⁵Haali/ waḵki/ ana tana imanwar ki isa ’de/ nyaḵki a’di e jwa jin waki jim piti mo tani ana minu warku/ ki isa ’de/ nyaḵki a’di e mompinum piti jin waki jim piti mo be.

⁶Haali/ ana misha ki bwan dhamom bana ’koshkunu jwa mo nyaḵki a’di mo, ki buŋgwar is gi miinthus yan minu ’ce’d sho’k mo ki ana mina ’taki ’koki ’ko mo mmota c̱iŋkina/ gi miinthus mo be.

⁷Haali/ a’di jin wuki’d mo tani a’di di’d ka po/ ’peni miinthus mo be.

⁸Dhali hili waḵki/ ana wuna mo nyaḵka Ḵrisṯẖos mo tani ana gama gwo is ki ana mina ’ko nyaḵki a’di mo be.

⁹Haali/ ana misha ka Ḵrisṯẖos a’di jin ’de’kkunu ’peni mowu midi diki wu doḵ/e ki sule/ mo. Mowu ta gi mom’bi’th ap̱o/ a’di doḵ/e yisa.

¹⁰Jwa jin wukina a’di mo tani a’di wuki’d gom miinthus mo be me’d ’de/ ki sule/ mo. Hili mondiki/e jin dina a’di ki e mo tani a’di diki’d ki e eya Arumgimis mo be.

¹¹Dhali wakan si’da/ um mini mii dhu is bum ki ku gun wukin mo gom miinthus mo dhali ’ko ki e eya Arumgimis mo eya Ḵrisṯẖos jin ta’da Yesus mo be.