Ruumalakutu 14:10-20

¹⁰Wiya nyurrangarri Yiitjuku walytja kutjupa tjuṯa panypurangkunytjaku. Nyurrangarri wiya mayutju nguwanpangku tjananya watjantjaku. Katutjalu kutju tjananya watjantjaku. Ngula paluru yuwankarra nganaṉanya kuutawutjungka ngaratjunkula watjalku.

¹¹Palunya nguwanpa Katutjaku wangka yirriṯi tjunutja yalatji ngarrinyi, “Ngayulu Katutjalu nyurrangarrinya tjukarurru watjaṉi yalatji. Ngula yaṉangu yuwankarrangku ngayunya pupakatirra waḻkulku.”

¹²Nganaṉa yuwankarrangku kuutawutjungka Katutjala ngarala tjakultjunku, mantangka nyinangutjangku.

¹³Nganaṉa wiya Yiitjuku walytja kutjupa mayutju nguwanpangku palunya watjantjaku. Purinypa nganaṉa wangkanytjaku paluru kulira Yiitjuku tjukarurru kutu nyinanytjaku.

¹⁴Mayutju Yiitjuluṉi nintiṉu yalatji. Katutjalu kuliṉi nganaṉa palya kuka yuwankarra, mangarri yuwankarraṯarra ngalkunytjaku. Tjinguru Yiitjuku walytja kutjungku kulilku kuka Katutjanya nguwanpaku tjunutja wiya ngalkunytjaku. Yalatji paluru kulira palya kuka palunya wantirra Yiitjuku tjukarurru nyinanytjaku.

¹⁵Tjinguru nyuntu kuka palunya ngalkuṉingka, Yiitjuku walytja kutjupangkunta nyakula watjilpa nyinaku, nyuntu kuya palyaṉutjakutjura kulira. Yalatji kuka palunya ngalkura nyuntu wiya yunytjurringkula nyinaku, Yiitjuku walytja palumpa. Nyuntu wati palumpa kulintjawiyangku kuka palunya kutu ngalkunytjala, Yiitjuku walytja paluru nyuntunya nguwanpa kuka palunya ngalkura kulilku, “Ngayulu kuka palunya ngalkura kuyalpiṉa palyaṉu.” Yalatji paluru kuya kutu palyara munupinarringkula Yiitjuku walytjawiyalpi nyinatjipingkamarra. Palunya nguwanpa wiya nyurrangarri kutjupaku kulilwiyangku kuka palunya ngalkunytjaku, wantinytjaku. Yiitjuku walytja palumpaku, kukawiya ngalkulpayiku Kurayitjanya mirrirringu, kana nyinatjunkunytjaku.

¹⁶Nyuntu kuliṉi kuka Katutjanya nguwanpaku tjunutja palya ngalkunytjaku. Tjinguru Yiitjuku walytja kutjupangkunta watjalku, “Nyuntu kuka palunya ngalkura kuya palyalku.” Yalatji nyuntu kuka palunya ngalkura kuya palyaṉutjakutjura kuliltjipingkamarra, kuka palunya nyuntu wantinytjaku, ngalkulwiyangku.

¹⁷Kukanguru mangarringuruṯarra wiyala akumanarrinytjaku. Nganaṉa Katutjaku walytja tjuṯangku kutjupa tjuṯaku palya nyinanytjaku, kaangkinytji. Nganaṉa Katutjaku tjukarurru nyinanytjaku. Yalatji tjukarurru nyinanytjaku Katutjaku kurrunpangku nganaṉanya nintilpayi. Yalatji nganaṉa nyinarra yunypa nyinaku.

¹⁸Yaṉangu yalatji Kurayitjaku tjukarurru nyinanyingka Katutjanyara yunyparriku, yaṉangu tjuṯaṯarraya palumpa yunypa nyinaku.

¹⁹Nganaṉa yalatji kulintjaku. Kutjupa tjuṯaku nganaṉa palya nyinanytjaku pikarrinytjawiya. Nganaṉa tjanala palya wangkanytjaku, tjana kulira tjukarurru kutu Yiitjuku nyinanytjaku.

²⁰Kuka mangarri yuwankarraṯarra nganaṉa palya ngalkunytjaku. Yiitjuku walytja kutjupangkunta kuka Katutjanya nguwanpaku tjunutja ngalkuṉingka nyakula kuya palyaṉutjakutjura kulilku. Nyuntunya nguwanpa kuka ngalkula tjinguru munupinarringkula Yiitjuku walytjawiyalpi nyinaku. Katutjaku walytjawiyalpi nyinaku. Katutjaku walytjawiya nyinatjipingka nyuntu kuka palunya ngalkuwiyangku wantinytjaku, paluru kutu Katutjaku walytja tjukarurru nyinanytjaku.