Ruka 4:4-26

⁴Mame Jezu a tozuhse. Ynara tykase eya, —Arypyra. Ynara tymerose Ritonõpo omiryme, “Wyi enapyryhtao rokẽ isene exizomopyra kuzenukõ mana. Yrome Ritonõpo omipona kuahtao xine orihzomopỹme exĩko sytatose,” ãko Ritonõpo omiry, tykase Jezu eya.

⁵Morotoino joroko tamuru a tarose ynororo ypy pona. Moro poe ahno tõ emero axĩ tonepose eya, pata tõkehko roropa tonepose eya. Ynara tykase eya,

⁶—Eneko ke. Moxiã emero opoetoryme ekarõko ase pata tõkehko maro, tykase. —Ykyryry sero kehko repe ya ekarotyamo. Yrome ise exiketomo a ekarory se jahtao ekarõko ase.

⁷Morara exiryke emero ekarõko ase oya opoetoryme toto ehtohme, oesekumuru po typorohse awahtao jẽpataka, “Kure mase, imehxo mase,” katohme ya, tykase eya joroko tamuru ajohpe rokene.

⁸Morarame ynara tykase Jezu eya, —Arypyra. Ynara ãko Ritonõpo omiry, “Oesẽkõ rokẽ eahmatoko, Ritonõpo. Aomipona rokẽ ehtoko roropa,” ãko Ritonõpo omiry, tykase Jezu joroko tamuru a.

⁹Morotoino Jerusarẽ pona tarose ropa Jezu eya. Morotona Ritonõpo maro oturutoh pona tarose eya, kaetokõ pona, tapyi mypatarãnaka. Ynara tykase ynororo eya, —Ritonõpo mũkurume awahtao, sero poe epukako nono pona.

¹⁰Ynara tymerose exiryke Ritonõpo omiryme, “Tynenyohtyã aropõko Ritonõpo mana oewomatohme,” me tymerose.

¹¹Ynara roropa, “Tomarykõ ke ãpoĩko toto opupuru osetapara ehtohme topu pona,” me tymerose roropa, tykase joroko tamuru Jezu a.

¹²Morarame Jezu a tozuhse. Ynara tykase, —Arypyra. Ynara ãko Ritonõpo omiry, “Oesẽkõme Ritonõpo exiryke onukuhpyra ehtoko ipunaka,” ãko, tykase Jezu eya.

¹³Mame tokurehse joroko tamuru Jezu kukuru poko. Iirypyryme onyripyra tokurehse ynororo. Mame toytose rokẽ aporo.

¹⁴Morotoino toytose ropa Jezu Karirea rãnaka ropa. Imaro Ritonõpo zuzenu jamitunuru kynexine. Morarame Jezu poko tokãtose Karireapõkomo a pata tõ punero, imehnõ kurãkatopõpyry poko eya.

¹⁵Jutea tõ atamorepatoh tao tamorepase toto eya. —To! Kure rukukuh mose amorepato nahe? tykase toto, Jezu etananõ emero.

¹⁶Morotoino Nazare pona toytose ropa Jezu, tuãtatopõpyry pona ropa. Mame oserematohae toytose ynororo atamorepatoh taka. Torẽnase ytose ynororo moro taka. Mame moro tao xikihme toehse Jezu Ritonõpo omiry sekerematohme imehnõ netaryme.

¹⁷Mame Izaja nymerohpyry tokarose imepyny a isekerematohme eya. Mame pape typiapose eya ahtao, tynymenekahpyry tysekeremase eya, ynara tykase,

¹⁸“Kuesẽkõ Ritonõpo zuzenu ymaro mana, tymenekase jexiryke eya imehnõ amorepaneme, etuarimaketõ amorepaneme, tõmiry kurã poko. ‘Totapuruhmakase ropa matose,’ kase tonehpose ywy ãpuruhpyrytaõkõ sã exiketomo a. ‘Tonure ropa matose,’ kase tonehpose roropa ywy tonurãkara a. Ataosanumaketõ osanumakehpose ropa tooehse ywy.

¹⁹Tonehpose roropa ywy ynara kase ipoetory tomo a, ‘Seroae opynanohtorỹko Ritonõpo mana,’” tykase Jezu, Izaja nymerohpyry tysekeremase eya.

²⁰Morotoino pape totapuruse ropa eya isekeremaxĩpo. Mame tokarose ropa orutua a, atamorepatoh erase akorehmane a. Mame typorohse ropa ynororo kohrame. Mame tonese eya xine tỹme.

²¹Mame tõturupitose eya xine. Ynara tykase, —Seromaroro sero ynysekeremahpyry ypoko kynako. Onetahpyrykõ morararo ypoko kynako, tykase Jezu eya xine.

²²Mame tõsenuruhkase toto, —To! Mose nysekeremahpyry hxo reh kure kynako, tykase. Imehnõ roropa ynara tykase, —Joze mũkuruhxo tã mosero roropa, tykase toto.

²³Mame ynara tykase Jezu eya xine, —Ynara katopõpyryae ro matose ynara ãko ya, “Opi warõme awahtao ãmoreme osepinohko,” katopõpyryae ro, morara ãko matose ya. “Kapanaũ po Ritonõpo jamitunuru tonepose oya imehnõ neneryme. Moro sã tyriko taro, oesary nymyry po,” ãko roropa matose ya, tykase Jezu eya xine.

²⁴—Yrome ynara ãko ase oya xine, urutõkõ eahmãko imehnõ mã repe. Yrome esarypõkõ mã oneahmara mã toto. (Ritonõpo omiry ekarone omiry etary se pyra imarõkõ mana.)

²⁵Etatoko pahne, zae rokẽ ynara ãko ase oya xine. Pake Eria maro tuhke pytỹpo tõ kynexine Izyraeu tomo, konopo oehpyra toehse ahtao. Oseruao jeimamyry motye taropose konopo oehpyra. Moromeĩpo tỹkyryneke pyra toehse toto Izyraeu tõ esary po. Tuhke pytỹpo tõ toetuarimase.

²⁶Yrome eya xine Eria onenyohpyra Ritonõpo kynexine. Imepỹ pytỹpo a rokẽ tonyohse, Saretapono a rokẽ tonyohse ynororo Ritonõpo a, akorehmase. Juteukara a tonyohse ynororo Xitõ rãnaõpono a.