Ruka 22:29-59

²⁹Naeroro Ritonõpo tuisame jyritopõpyry saaro tuisame oritorỹko roropa ase ymaro tuisame oehtohkõme.

³⁰Morarame emero esẽme toehse jahtao ymaro otuhnõko matose Ritonõpo esao. Mame ymaro tuisa apõ pona porohnõko matose sero nonopõkõ apiakatohme. Ritonõpo omipona pyra exiketomo a ynara ãko matose, “Iirypyryme matose Ritonõpo a,” ãko matose. Yrome aomipona exiketomo a, “Iirypyryme pyra matose Ritonõpo a,” ãko matose. Morara ãko roropa matose Izyraeu mũkuru tõ pakomotyamo a.

³¹—Ximão, tykase Jezu Ximão Peturu a. —Etako pahne! Ynara tykase sã joroko tamuru opoko, “Ximão kuhnõko ase iirypyryme aehtohme,” tykase sã repe, jurumekapory se toexiryke oya. “Ikuhko toto, ypoetory tõ emero,” ase eya repe.

³²Yrome opoko oturuase Papa kapuaõ maro jenetupuhkehpyra oehtohme. Mame ya tooehse ropa awahtao moxiã ãkorõ tõ ijamihtanohko ropa, yronymyryme jenetupuhtohme eya xine, tykase Jezu eya.

³³Ynara tykase Peturu eya, —Yna esẽme mase. Orumekara ase. Opyno exikehpyra roropa ase jũme. Ãpuruhpyry taka aaroryhtao, amaro ytõko ase ãpuruhpyry taka. Totapase awahtao eya xine jorikyry se ase amaro, tykase Peturu Jezu a, repe.

³⁴—Etako pahne Peturu, kuratiri etararo ahtao seroae, “Jezu waro pyra ase! Jezu waro pyra ase!” ãko mase oseruao, tykase Jezu eya.

³⁵Mame ynara tykase Jezu 12mãkomo a, —Osemazuhme oenyokyrykohtao ya tineru anaropyra mexiatose. Saku te, sãtaja roropa anaropyra mexiatose. Oty se ro mexiatose etuarimara oehtohkõme? —Arypyra, tykase toto.

³⁶—Yrome seromaroro etatoko pahne, tykase Jezu eya xine. —Tineru ẽ nae awahtao xine, saku roropa, arotatoko amaro xine. Tapema nae ahtao arotatoko. Arypyra ahtao, oupõkõ ekamotoko tapema epekahtohme, tykase Jezu eya xine.

³⁷—Etatoko pahne, ynara katopõpyry zae mana. Ypoko ynara tymerose Ritonõpo omiryme pake, “Popỹ sã mokyro rĩko pohnõ mana,” me tymerose. Morara katopõpyry anamonohpyra mana, tykase Jezu eya xine.

³⁸Ynara tykase Jezu a ipoetory tomo, —Eneko ke. Seny, asakoro tapema, tykase toto. —Epo mana, tykase rokẽ Jezu eya xine.

³⁹Morotoino pata poe toytose ynororo ypy pona, Oriwera pona. Toipe Jezu ypy Oriwera pona ytosene oturuse Tumy maro. Mame imaro toytose ipoetory tomo.

⁴⁰Morarame morotona toeporehkase tahtao xine ynara tykase Jezu typoetory tomo a, —Oturutoko Ritonõpo a oorypyrykõ poko oripopyra xine joroko tamuru ehtohme, tykase.

⁴¹Morotoino toytose ynororo myahme sã pitiko toiroro toehtohme. Tosekumuru po typorohse tõturutohme Tumy a.

⁴²Ynara tykase ynororo, —Papa kapuaono, ypynanopyry waro mase, orihpyra jehtohme. Jorikyry se pyra ase. Zuaro mase. Yrome õmipona se rokẽ ase. Naeroro jorikyry se awahtao, oty kara ase, tykase Jezu Tumy a.

⁴³Mame Ritonõpo nenyokyhpyry kapu ae tyhtose Jezu jamihtanohtohme.

⁴⁴Morarame samũ tykase Jezu tukurohtao. Yronymyrymehxo tõturuse Ritonõpo a ynororo. Munume tonãkutase ynororo toemynyhmaryke. Pitah tykase enãkuru nono pona.

⁴⁵Mame tõturukehxĩpo, towõse ropa ynororo xikihme. Typoetory tomo a toytose ynororo. Nyhnõko toh kynexine toemynyhmarykõke.

⁴⁶Ynara tykase ynororo eya xine, —Oty katohme nyhnõko matou? Apakatoko ropa sahxo ty! Oturutoko roropa Ritonõpo a, oorypyrykõ poko pyra oehtohkõme, tykase Jezu eya xine.

⁴⁷Morarame autururuhtao ro, tuhkãkõ tooehse morotona. Juta tooehse esemazupurukõme Jezu enepotohme eya xine. 12mãkõ maronõpo Juta kynexine. Mame Jezu a toytose ynororo eahmase repe.

⁴⁸Yrome ynara tykase Jezu eya, —Juta, Ritonõpo nymenekahpyryme ase. Oty katoh jeahmãko mah jewokatohme rokene? Yzehnotokomo a jenepotohme rokẽ mase, tykase. Onezuhpyra Juta toehse.

⁴⁹Morarame tosẽkõ apoiry waro toehse tahtao xine ynara tykase Jezu a ipoetory tomo, —Moxiã akohnõko ynanah? tykase toto.

⁵⁰Mame tytapemã ke imepỹ takohse Jezu poetory a, toiro. Ritonõpo maro oturuketõ tuisary namoto typanasahkase eya.

⁵¹—Epo hnae, tykase Jezu eya xine. Mame ipanary tapose eya. Kure totyhse ropa axiny.

⁵²Mame ynara tykase Jezu Juta marõkomo a, Ritonõpo maro oturuketõ tuisary tomo a, Ritonõpo maro oturutoh erase tõ maro, tamuximãkõ maro roropa, —Oty kase moehtou? Japoiry se mexitou omato apoiry samo? Tytapemake matose, tykaparuke roropa.

⁵³Kokoro rokẽ amaro xine exiase Ritonõpo maro oturutoh tao. Moro tao jahtao japoipyra mexiatose. Sero kohmamyryae rokẽ japoĩko matose tykohmãse exiryke. Iirypyrymãkõ esẽ oesẽkõme mana, joroko tamuru. Oesẽkõme aexiryke aomipona matose, tykase Jezu eya xine.

⁵⁴Mame Jezu tapoise eya xine rahkene. Tarose roropa eya xine Ritonõpo maro oturuketõ tuisary tapyĩ taka. Ameke rokẽ Peturu a tokahmase toto.

⁵⁵Mame apoto tukase kynexine tapyi myhto, apuruhpyry rãnao. Moro apoto zomye kohrame toehse toto. Peturu roropa toto maro kohrame toehse.

⁵⁶Mame apoto pũto Peturu tonese nohpo a. Ynara tykase ynororo, —Mose roropa Jezu maro nexiase, tykase.

⁵⁷—Atahmãkara exiko. Mokyro waro pyra ase, tykase Peturu eya.

⁵⁸Moromeĩpo orutua a tonese Peturu. —Omoro mase Jezu poetoryme roropa, tykase ynororo eya. —Arypyra, ywy kara. Ipoetoryme pyra ase, tykase Peturu.

⁵⁹Morarame okynã pitiko ahtao imepỹ roropa orẽpyra tõturuse Peturu maro. —Ajohpe pyra. Jezu maronõpome mase, Karireapõme oexiryke, tykase.