Ruk 12:4-18

⁴Giporpat Jisas oh Norhe han gur norhe ma napotiproh meng moh dahenmur. Hanip ihir ina teinongwi niptimur. Haputperhan danong nasutin oh da na nasupti ohoh ihan ina teimdapatwi nipti bap ihirnong kasa hapri.

⁵Got oh ina teisi; dasi tap mat nima da oh batbet dar patepri ohe irat has teinong nahatin han ohnong kasa hat patenmur. Ama inahat nitin han orhornongwi kasa hat patenmur.

⁶Ner twitwi ihirnong dahenmur. Ama ner gar ihirnong mohotper riyahanoh sup tan titwi ner gar hanen oh mohoptimur. Na dahatin ner gar orhor Got orhor dahat patin suptimur.

⁷Hanip dire kak batnonghe sam am hatper na dahapti han orhor Got orhor sam am hat patmur. Hanip dire na dahapti ner gar oh Got orhor am ham yahnap hanmur porpat ohoh ihan hanip dirnong oh atnap isip yahnap hanmur napor yahnap mat orhor napapatmur. Got oh yahnap hanmur napor napapat ohoh ihan gur ina teimdapat ma nipti han ihirnonghe kasa hapri pongopri.

⁸Jisas oh giporpat Han gur ihirnong na kasa ham Nohri Jisas orhe nita ham ihat sapatmur rit sayahanoh ama ihat saya han gurnong oh Hanip Brer noh at Got orhe atamreipti han enser ire kinteihe noh Maihir norhe nita bap ihirmur potipramur.

⁹Ihirnong kasa ham ire kintei Jisas ohnong nuhur hanhanmur riyahanoh Nohhe gurnong at orhe atamreipti han enser ire kinteihe noh Maihir norhe nita bap ihir basmur. Noh ihirnong hanhanmur potipramur.

¹⁰Gin gur mohnong dahenmur. Gur Hanip Brer nohnong dasei meng napor inahayahanoh ama inahaya ohe pe er yan oh Got oh dat namdatin ina hat patmur. Got ohe Yahsup ohnong dasei mar indeiyahanoh ama indeiya ohe pe er yan oh dat na namdatiprohmur.

¹¹Hanip ihir gurnong Maihir Jisas ohe nita han bapmur napor gurnong nambur dahanahatinmat rotu apnongdo gapman ohe atamreipti han ire duupnongdo napisayahanoh gur Epe. Dire boknong meng ma nahatiprohe oh dir kian meng sa potiprohe daham da darhetipri.

¹²Napisus dahanahaptin orhor Got orhe Yahsup oh gurnong Mama meng moh potina napor rit natiprohmur pongopri.

¹³Gahan kuuhan ruumsan tarmut pati mutuhdapat tit han tit Jisas ohnong Tisa. Go norhe nanip ohnong potinmur. At ohe pan erer oh oh ruumsannap mat papat ohoh ihan go Kat tit nangga ohnong apin potinmur pongopri.

¹⁴Potporhan Jisas oh Mona. Nohri erer oh sama hanip nitat mar napin han basmur pongopri.

¹⁵Giporpat ama kuuhan gonsi ihirnong Gur dahenmur. Erer ruumsansi ma pati ohe pe oh yah hat indin dasi na haptimur. Ihapti ohoh ihan gur Erer oh nohwi ruumsan mat orhorwi datpora dahapti ohe danong oh nahatiprarim gur potahat patenmur pongopri.

¹⁶Giporpat ihir erer oh dar ruumsansi hatpora dahapti ohe danong oh hatipririm mama paham mengnong moh dahatinmur. Han kamah han tit den ruo erer oh ruumsansi han tit ama patesuh oh. Gahan ohe den ru oh dam ruumsan isipnap ama timdip oh.

¹⁷Timdiporhan oh Noh den dam ruumsan tima moh ohe pe oh noh ihsen ruumsan titsi datiprawa dahama Gin itin ap oh timbas hat pat moh noh kinhatiproh sa dahapat

¹⁸Ihan noh erer it pat ap morhor urkamat sara ap isip mat yah mat orhor hatpora. Ham mamen deipat norhe wito den erer oh apnong moh mat sara ama ohe pe oh yah hat pateprawa.