Room Tere 8:1-35

¹Kawaajoŋ ejemba Kraist Jiisaswo qokotaaŋ nanjoŋi, Anutunoŋ mono ananaa qaanana jeŋ tegoro kambaŋ kokaamba gere siawaa buŋa mende kolooŋ laligojoŋ.

²Kawaa kania kokaeŋ: Gii siŋgisoŋgowaa siiŋa teŋ koma laligonatiwaajoŋ ama koomu kotigaa buŋa kolooŋ laligona. Kaaŋa laligonato, Kraist Jiisaswo qokotaaŋ nana laaligo kotigaa Uŋayanoŋ mono koomu kotigaa kasanoŋga isama gono laligojaŋ.

³Ejemba uuselenananoŋ siiŋnana kombombaŋa bologa ii eja. Ii otaaniŋ Kana qaawaa esuŋanoŋ looriŋ laaligo kombombaŋa nonombaatiwaajoŋ amamaaro osiŋ qagoniŋ. Qagoniŋ uuselenananoŋ siŋgisoŋgo ama laligoniŋi, Anutunoŋ siŋgisoŋgo iikawaa qaaya jeŋ tegoŋ kitia kokaeŋ meleeno: Iinoŋ iyaŋaa Meria wasiro namonoŋ kamaaŋ siŋgisoŋgo ejawaa sele kaaŋa kolooro. Toroqeŋ siŋgisoŋgowaa siimoloŋ tani kaaŋa kolooro oogi komuro. Anutunoŋ laaligo kotigaa kania kaeŋ meleuro.

⁴Anutunoŋ kania ii kokaembaajoŋ meleuro: Kana qaanoŋ anana solaŋa ano dindiŋa laligowombaajoŋ jeŋ kotoŋ nonomakeji, Anutunoŋ qaa iikawaa hoŋanoŋ ananaanoŋ koloodaborowaatiwaajoŋ moro. Kawaajoŋ uuselenanaa siiŋa kombombaŋa bologanoŋ mende galeŋ koma nonombiwaajoŋ togoŋ Uŋa Toroyaa uusiiŋa teŋ kombombaajoŋ namakejoŋ.

⁵Ejemba uuselegiaa siiŋ kombombaŋa bologa otaaŋkejuti, iyoŋoo uugianoŋ mono siŋgisoŋgo ambombaajoŋ eja. Ejemba Uŋa Toroyaanoŋ siiŋ otaaŋ amakejoŋi, ananaa uunananoŋ mono Uŋa Toroyaanoŋ nanamemeŋ amboŋiwaajoŋ eja.

⁶Uuselenanaa siiŋ kombombaŋa bologanoŋ mono horoŋ nonono koomu kotigaageŋ kembombaajoŋ ejato, Uŋa Toroyanoŋ uunananoŋ luae qero kotiiŋ laligowombaa siiŋa momakeja.

⁷Anutunoŋ Kana qaa nonono siŋgisoŋgo ambombaa siiŋ kombombaŋanoŋ mono qaa iikawaa baatanoŋ mende kemakeja. Ii kemambaajoŋ amamaaja. Ii amamaaro tondu laligoŋ uunananoŋ Anutu qetama kere ama muŋkejoŋ.

⁸Ejemba uuselewaa siiŋgia kombombaŋanoŋ galeŋ koma oŋoŋgi tondu laligojuti, iyoŋonoŋ mono Anutuwaa jaanoŋ sokombombaajoŋ osiwuya.

⁹Yoŋonoŋ osiwuyato, Anutuwaa Uŋa Toroyanoŋ oŋoo uugianoŋ laligoji eeŋ, iinoŋ mono galeŋ koma oŋono laligoju. Uuselewaa siiŋgia kombombaŋa bologa yoŋonoŋ mono oŋo mende galeŋ koma oŋomakeju. Kraistwaa Uŋa Toroyanoŋ mombaa uutanoŋ mende kemero eeŋ laligoji, iinoŋ Kraistwaa buŋa mende kolooja.

¹⁰Mende koloojato, Kraistnoŋ oŋoo uugianoŋ laligoji eeŋ, sele busugianoŋ siŋgisoŋgowaajoŋ ama komuwuyato, uŋagianoŋ solaŋa koloojutiwaajoŋ ama kotiiŋ laligoŋ ubuya.

¹¹Anutunoŋ Kraist Jiisas meŋ gbiliro koomunoŋga waaroti, iwaa Uŋayanoŋ uugianoŋ laligoji eeŋ, iyoronoŋ oŋo Anutuwo qokotaaŋ naŋgi selegia koomuya ii kaaŋagadeeŋ meŋ gbiliwaota.

¹²Oo uumeleeŋ alauruna, gbiliŋ laligojoŋiwaajoŋ nononoŋ mono Anutuwaanoŋ tosawo laligojoŋ. Uuselewaa siiŋnana kombombaŋa bologa otaawombaa tosaga qaagoto, Uŋa Toroyaa jeta teŋ koma laligowombaa tosayanoŋ mono eŋ nononja. Kawaajoŋ ananaa aiŋnananoŋ laŋ laligowombo.

¹³Uuselewaa siiŋgia kombombaŋa bologa otaaŋ laligojuti eeŋ, oŋo mono koomu kotigaa buŋa koloowuya. Kaaŋa koloowuyato, Anutu qama kooligi Uŋa Toroyanoŋ uuselegiaa nanamemeŋ bologa meŋ komuŋkebaati eeŋ, iikaaŋa kanoŋ mono gbiliŋ kotiiŋ laligoŋ ubuya.

¹⁴Anutuwaa Uŋayanoŋ ejemba qindiŋgoŋ uŋuano laligojuti, iyoŋonoŋ kuuya Anutuwaa meraboraaŋa kolooju.

¹⁵Omejiilaŋ yoŋonoŋ ejemba sololooŋ oŋoŋgi jeneŋgia ororo weleŋqeqe omaya kolooŋ laligojuto, oŋo ome kaaŋa ii moŋ qaagoto, Uŋa Toroya ii buŋa qeŋ aoŋ laligoju. Kawaajoŋ oŋo mono mombo toroqeŋ toroko qaganoŋ laligowubo. Uŋa Toroya iinoŋ mono meŋ letoma oŋono Anutuwaa meraboraaŋa kolooju. Uŋa iikanoŋ sololooŋ nonono Anutuwaajoŋ “Aba Ama!” qamakejoŋ.

¹⁶Anutuwaa meraboraaŋa koloojoŋi, qaa ii Uŋa Toroyanoŋ aŋo ananaa uŋananawo wambelaaŋ motooŋ naŋgoŋ jeŋkejao.

¹⁷Anutuwaa meraboraaŋa koloojoŋi eeŋ, iinoŋ iyaŋaa ejembauruta ananaajoŋ oyaŋboyaŋ mozozoŋgoro eji, ii kaaŋagadeeŋ buŋa qeŋ aowoŋa. Anutunoŋ Kraistwaajoŋ iwoi mozozoŋgoro eji, ii mono kaaŋagadeeŋ Kraistwaa kooroŋanoŋ nama buŋa qeŋ aowoŋa. Kraistwo motooŋ siimbobolo momakejoŋi eeŋ, mono kaaŋagadeeŋ Kraistwaa asamararaŋanoŋ uma iwo motooŋ asariŋ laligowoŋa. Kiaŋ.

¹⁸Kambaŋ kokaamba siimbobolo moma laligojoŋi, iikanoŋ laaligo kamaaŋqeqeta kolooja. Kanageŋ Kraistwaa asamararaŋanoŋ uma asariŋ oyaŋboyaŋ laligowoŋati, iikanoŋ mono laaligo uuta akadamuyawo koloowaa. Laaligo woi ii leelee ama gosiwoŋatiwaa so qaago. Kaaŋ romoŋgojeŋ.

¹⁹Anutunoŋ oro ano iwoi kuuya mokoloorota ejuti, iyoŋonoŋ mono mamboma Kraistnoŋ kaŋ Anutuwaa meraboraaŋa metogoŋ qendeema oŋono asamararaŋ asugiŋ oŋombaatiwaajoŋ awelegoŋkeju.

²⁰Anutunoŋ oro ano iwoi kuuya mokolooroto, yoŋonoŋ laligoŋ komuŋ qaombuya. Iyaŋgiaa siiŋgiaa so qaagoto, Anutunoŋ mono iyaŋaa siiŋaa so kaeŋ areŋgoro. Iwoi kuuya qaombuyato, kileŋ jejeromoŋromoŋ oŋono oyaŋboyaŋ kokaeŋ asugiwaatiwaajoŋ mambomakeju:

²¹Anutunoŋ oro ano iwoi kuuya mokoloorota ejuti, iyoŋonoŋ mono kaaŋagadeeŋ kokaembaajoŋ mambomakeju: Anutunoŋ ii kaaŋagadeeŋ aŋgonjora laaligowaa kasayanoŋga isama oŋono mende komuŋ gisaaŋ qaombuyato, Anutuwaa merabora kaaŋa lolooŋ asamararaŋgiawo asariŋ eŋ ubuya.

²²Kawaa kania ii kokaeŋ: Anutunoŋ oro ano iwoi kuuya mokoloorota ejuti, iyoŋonoŋ korebore mono motooŋ osoŋgoŋ horoŋ merabora memewaa masu uŋuŋkeji, iikaaŋa moma eŋ kouma kambaŋ kokaamba kaaŋagadeeŋ amakeju, ii mojoŋ.

²³Anutunoŋ oro ano iwoi kuuya mokoloorota ejuti, iyoŋoonoŋga qaagoto, Anutuwaa yambuyambu kolooniŋ Uŋaya Toroya kaleŋa nonono laligojoŋi, anana mono kaaŋagadeeŋ uunananoŋ osoŋgoŋ horoŋ laligoŋkejoŋ. Anutunoŋ nunuano meraboraaŋa qaita moŋ koloowombaajoŋ mamboma laligoŋ osoŋgoŋ amakejoŋ. Nunuama dowenana mero selenana qaita moŋ buŋa qeŋ aoŋ Siwenoŋ uma qeaŋgowaatiwaajoŋ awelegoŋ laligojoŋ.

²⁴Kaaŋa letombombaajoŋ jejeromoŋromoŋ ama uunana meleema Siwewaa buŋa koloowoŋa. Iwoiwaajoŋ jejeromoŋromoŋ amakejoŋi, iikawaa hoŋa kolooro iiniŋ jejeromoŋromonana iikaaŋa kanoŋ tegowaa. Moŋnoŋ iwoiwaa hoŋa kolooro iima iikawaa jejeromoŋromoŋa ii mende toroqeŋ ama mambomakeja. Ii qaago.

²⁵Iwoiwaa hoŋanoŋ mende kolooro iimakejoŋi, iikawaajoŋ jejeromoŋromoŋ anjoŋi eeŋ, ii mono kaparaŋ koma koloowaatiwaajoŋ mamboniŋ uunana mende kamaaŋkeja.

²⁶Kaaŋiadeeŋ looriniŋ Uŋa Toroyanoŋ ilaaŋ nonomakeja. Nomaeŋ qama kooliniŋ sokonaga, ii mende mojonto, Uŋa Toroyanoŋ mono aŋo qamakooli gawonananoŋ ilaaŋ nonoma ananaajoŋ ama qama kooliŋ qaa jeta asuganoŋ jejewaa so qaagoto, osoŋgoŋbooro qaganoŋ saŋenoŋ jeŋkeja.

²⁷Saŋenoŋ jeŋ Anutuwaa siiŋaa so ejemba soraaya ananaajoŋ ama qama kooliŋkeja. Anutunoŋ ejemba uunana iima gosiŋkeji, iinoŋ mono afaaŋgoŋ Uŋa Toroyaa uumomoya momakeja.

²⁸Anutunoŋ qamakoolia moma ilawoila kuuya galeŋ kono kawaa mindimindiri hoŋanoŋ mono iyaŋaa alaurutanoŋ qeaŋgowutiwaajoŋ kolooŋkeja. Ii mojoŋ. Hoŋa iikanoŋ ejemba hamoqeqe areŋaa so oŋoono jopagoŋ muŋkejuti, mono ii kaeŋ me kaeŋ ilaaŋ oŋomakeja.

²⁹Anutuwaa areŋaa kania ii kokaeŋ: Iyaŋaa Merianoŋ uumeleeŋ ala seiseiya ananaa batunananoŋ jeta meŋ nonombaatiwaajoŋ momakeja. Kawaajoŋ waladeeŋ areŋ ama nonono taninananoŋ Meriaa so koloowombaajoŋ moro. Iikawaajoŋ ejemba waladeeŋ moma nononoti, nono kaaŋagadeeŋ koloowombaajoŋ jeŋ meweeŋgoŋ nonono.

³⁰Waladeeŋ jeŋ meweeŋgoŋ nononoti, anana kaaŋagadeeŋ nonoono. Nonoonoti, ananaa qaanana kaaŋagadeeŋ jeŋ tegoro solaŋaniniŋ. Solaŋaniniŋi, ananaajoŋ kaaŋagadeeŋ kana qendeeno iyaŋaa asamararaŋanoŋ uma oyaŋboyaŋ laligowoŋa. Kiaŋ.

³¹Qaa ii moma kawaajoŋ nomaeŋ jewonaga? Anutunoŋ sopa somoŋgoŋ nonoma leegenananoŋ laligoji eeŋ, moronoŋ mono qotogoŋ nononaga?

³²Anutunoŋ iyaŋaa Meria kaaŋiadeeŋ mende aŋgoŋ konoto, ii jeŋ tegoro laaligoya kuuya ananaajoŋ ama qeleeno. Ii qeleeno Anutunoŋ iwo kaleŋ qereweŋa tosaaŋa kuuya ii kaaŋagadeeŋ afaaŋgoŋ nonombaa.

³³Anutunoŋ ejemba iyaŋaajoŋ meweeŋgoŋ nonoma qaanana jeŋ tegoro solaŋaniŋkejoŋi, iikawaajoŋ moronoŋ mono qaa jakeyanoŋ ama nononaga?

³⁴Kraist Jiisasnoŋ komuro Anutunoŋ mombo meŋ gbiliro Siwenoŋ uma Anutuwaa boro dindiŋanoŋ rama toroqeŋ ananaajoŋ ama qama kooliŋkeja. Kawaajoŋ moŋnoŋ moŋ qaanana gosiŋ gere sianoŋ kemebombaajoŋ jeŋ tegoŋ nonomambaajoŋ amamaawaa.

³⁵Kraistwaa uujopa uutanoŋ laligoniŋ moronoŋ mono iikanoŋa mendeema nonono kamaawonaga? Kakasililiŋ ama nonoŋgi koŋajiliŋ mobonagato, Kraistwaa uujopayanoŋga saanoŋ mende kamaawoŋa. Sisiwerowero ama nonombuyagato, iikanoŋa saanoŋ mende kamaawoŋa. Bodi mokoloowonaga me opo surunananoŋ qaono laligowonaga, mono saanoŋ mende kamaawoŋa. Komuwombotiwaa toroko qaganoŋ laligowonaga me manja qegi kazi koloonagato, mono saanoŋ mende kamaawoŋa.