ROMUDEENƆ 11:17-31

¹⁷Luda kù lí yãpura gã̀ kenↄ zↄ̃̀zↄ̃, ben à mmↄn kɛ̀ ń dɛ kùtɛ̃ lí ũu pɛ̀ à gbɛ̀n, lɛ ǹgↄ̃ kuu kↄ̃n kù lí maaa kãsã gbãaao.

¹⁸Ǹton kya ká kù lí yãpura gã̀ kɛ̀ à zↄ̃̀zↄ̃nↄnlo. N kɛ dia nɛ́ɛ ĩa dãa? Ń kuu lí kãsãa yãnzimɛ, èe kɛ lí kãsãa bé à kuu n yãnziro.

¹⁹Nɛ́ be, à lígã pìnↄ zↄ̃̀zↄ̃ lɛ à n pɛ́ ń gbɛ̀n yãnzimɛ.

²⁰Lɛmɛ, mↄde à ń zↄ̃zↄ̃ kɛ̀ aↄ̃ↄe a náanɛ kɛro yãnzi. Mmↄn sↄ̃, n zɛkii è kɛ̀ nɛ́ɛ Luda náanɛ kɛɛ yãnzi. Ǹton wada kɛro. Ǹ làakari kɛ!

²¹Lán Ludaa e gí kù lí yãpura gã̀nↄ zↄ̃zↄ̃ziro nà, eé gí n zↄ̃zi sero.

²²Ǹ gwa lán Ludaa maa nà bensↄ̃ à pãsĩ. À pãsĩ kↄ̃n gbɛ̃ kɛ̀ aↄ̃ fùanↄ, ben à maannɛ, tó n zɛ kↄ̃n à maakɛnao. Tó lɛnlo, eé n zↄ̃mɛ se.

²³Tó Isarailinↄ ń ludanaanɛkɛsai tò, eé ɛara à ń pɛ́ ń gbɛ̀mmɛ, zaakɛ à ń pɛna ń gbɛ̀n gbãa vĩ.

²⁴Tó Luda n zↄ̃ kùtɛ̃ lía à n pɛ kù lí yãpuraa lán wè kɛro nà, kù lí gã̀ yãpuraanↄ ɛara à pɛna ń zĩnda lía zɛ́ vĩ dɛ beeelaroo?

²⁵Ma gbɛ̃nↄ, má yezi àgↄ̃ asiiyã kɛ̀kii dↄ̃, lɛ a wɛ́ɛ tóngↄ̃ sia à a zĩnda diɛ ĩadãrinↄ ũro yãnzi. Isaraili kpaaanↄ swãgbãa kũ̀ gĩa ai bori pãndenↄ gɛ̃na kpata kɛ̀ bↄ̀ Luda kiia guu lɛ́ gↄ̃ ká.

²⁶Beee gbɛra Luda é Isarailinↄ mì sí ń píngi lán à kɛ̃na Luda yãn nà kɛ̀ wà bè: Mìsiri é bↄ Zayↄn, eé Yakubu boriinↄ kɛ̃ ludadↄ̃saia.

²⁷Ma bà kuunańyo yãn gwe gurↄↄ kɛ̀ mɛ́ ń durunnↄ kɛ̃ńnɛ.

²⁸Baaru nnaa pì yã musu aↄ̃ↄ dɛ Luda ibɛɛnↄ ũ a yãnzi. Luda gbɛ̃nↄ sɛna yã musu aↄ̃ↄ dɛ Luda yenzideenↄ ũ aↄ̃ dezinↄ yãnzi.

²⁹Zaakɛ ludangbaanↄ kↄ̃n gbɛ̃ kɛ̀ à ń sísi à ń sɛ́nↄ è sí liɛro.

³⁰A bori pãndenↄ ée Luda yã ma yãro. Tia sa Luda sùu kɛ̀ao kɛ̀ Isarailinↄↄ e à yã maro yãnzi.

³¹Lɛn Isarailinↄ gì Luda yã mazi lɛ tia, lɛ Luda e à sùu kɛao, gbasa à sùu kɛńyo.